Türk metbugatynyň gysgaça mazmuny 28.10.2015

“Haber Türk” gazeti “Terror we bosgun meselesi G20-niň gün tertibinde” söz başyly habarynda, G20-niň noýabr aýynyň 15-16-sy aralygynda Antalýada geçiriljek ýokary derejeli maslahatynda terrorçylyga garşy göreş we bosgun meselesiniň seljeriljekdigini ýazýar. Gazet soňky döwürde Türkiýä, sebit ýurtlaryna we bütin dünýä täsirini ýetiren terroryň, şol sebäpli ýüze çykan bosgun meselesiniň G20-niň maslahatynda aýratyn gün tertibine getirilmegini islän Prezident R.T.Erdoganyň isleginiň ABŞ-nyň Prezidenti Barak Obamanyň, Russiýanyň Prezidenti Wladimir Putiniň başda durmagynda G20-ä gatnaşjak ähli liderlerin kabul edendigini okyjy köpçüliginiň dykgatyna ýetirýär.
“Watan” gazeti “ABŞ-nyň PÝD ýalňyşy” söz başyly habarynda, ozalky daşary işler ministri Mewlüt Çawuşoglynyň “ABŞ-nyň Siriýa syýasatynyň ýalňyşdygyny Türkiýe 5 ýyldan bäri aýdyp gelýär. Amerikaly ýolbaşçylar meselä düşünmändikleri üçin indi gynanç bildirýärler” diýen sözlerini okyjy köpçüliginiň dykgatyna ýetirýär. Gazet ABŞ-nyň Siriýa meselesinde ýene-de bir ýalňyşlyk goýberendigini nygtan Çawuşoglynyň:”Bir terror guramasyna garşy başga bir terror guramasyny goldaýarlar. Terror guramasy PÝD-ä ýarag berip, bigünä adamlaryň ölmegine sebäp bolýarlar” diýen sözlerini çap edýär.
“Ýeni Akit” gazeti “Uzak aralykly roketa boýunça karar” söz başyly habarynda, Türkiýäniň uzak aralykly howa goranyş ulgamynyň üpjünçiligi boýunça soňky tapgyra ýetilendigini mälim edýär. Habarda uzak aralykly roketalaryň nireden alynjakdygy barada kabul ediljek kararyň ballistiki roketalary hem öz içine alýandygy nygtalýar. Gazet roketalaryň aralygynyň 3 müň kilometre çenli baryp ýetýändigini, ulgamyň Türkiýede öndürilmegi üçin hem işe girişiljekdigini ýazýar.
“Star” gazeti “Türk lukmanlarynyň üstünligi:göbek bagy ýürege öwrüler” söz başyly habarynda, türk lukmanlarynyň infrakt netijesinde emele gelen öýjük zaýalanmasyny bejerjek barlagy durmuşa geçirendigini okyjy köpçüliginiň dykgatyna ýetirýär. Gazet göbek bagyndan alynan düýp öýjükleriň ýürek bejergisinde peýdalanyljakdygyny mälim edýär.
“Sabah” gazeti “Eýranyň Saman banky maýa goýmaga gelýär” söz başyly habarynda, Eýran bilen täze ýylda güýje giren İslege bagly söwda ylalaşygynyň bankçylykda täze maýa goýumlarynyň ýoluny açandygyny nygtaýar. Habarda Bank Melladyň 2014-nji ýylyň mart aýynda şahamça açmak barada rugsat almagyndan soň Saman bankyň hem Türkiýede maýa goýmak üçin Türkiýäniň Bankçylyk edarasyna ýüz tutandygy okyjy köpçüliginiň dykgatyna ýetirilýär.