Türk metbugatynyň gysgaça mazmuny 27.05.2015

“Sabah” gazeti: “Gebzede informatika jülgesi gurulýar” söz başyly habarynda, informatika jülgesiniň düýbüniň Gebzede Bilim, senagat we tehnalogiýa ministri Fikri Yşygyň gatnaşmagynda tutulandygyny okyjy köpçüliginiň dykgatyna ýetirýär. Gazet Yşygyň jülgäniň tutýan meýdanynyň 3 million inedördül metrdigini, bilimiň tehnologiýa, tehnologiýanyň bolsa haryda öwrüljek bu ýeriň Türkiýäniň bilim merkezleriniň iň ulusy boljakdygyny nygtandygyny belleýär. Habarda Yşygyň jülgede diňe bir informatika firmalarynyň däl, eýsem informatika tehnologiýasyna bagly harytlary öndürjek ähli derňew geçirýän firmalarynyň ylmy işleri geçirip biljekdigini aýdandygy ýazýar. Gazet Yşygyň jülgäniň töwereginde kemala geljek ekosistem bilen 5 müň ylmy-derňew işlerini geçirýän firmanyň we takmynan 100 müň adamyň işlejek bir owadan ýere öwrüljekdigini aýdandygyna ünsi çekýär.

“Star” gazeti: “Awiasiýa sergileri indi Ankarada geçiriler” söz başyly habarynda, Ankara Halkara sergi merkeziniň düýbiniň düýn dabaraly ýagdaýda tutulandygyny mälim edýär. Gazet sergi merkeziniň Ankaranyň we pudagyň ösüşine görä ulaldylyp ýa-da kiçeldilip boljak ýagdaýda guruljakdygyny, gurluşygy tamamlananda dünýäniň iň uly 100 sergi merkeziniň biri boljakdygyny ýazýar.

“Ýeni Şafak” gazeti: “Ýaponiýanyň Fujitsusyndan Türkiýä maýa goýum” söz başyly habarynda, Fujitsunyň Ýaponiýadan başga maýa goýuljak esasy 10 ýurduň arasyna Türkiýäni hem sanawa goşandygyny habar berýär. Gazet firmanyň Türkiýedäki ýolbaşçysy Selda Bagdat Bahadyryň Türkiýäniň ösüş depgini, türkleriň tehnologiýa öwrenişmeginiň ýokarlylygy, tehnologiýanyň gündelik durmuşda ulanylmagynyň köplügi sebäpli sanawa alynandygyny aýdandygyny belleýär. Habarda Bahadyryň Fujitsunyň Türkiýä hem tehnologiýa getirjekdigini hem-de ýerli işewür adamlar bilen hyzmatdaşlyk etjekdigini nygtandygyny ýazýar.

“Haber Türk” gazeti: “Güler Sabanjy Dünýäniň iň güýçli 100 zenany sanawynda” söz başyly habarynda, Forbes žurnalynda çap edilen “Dünýäniň iň güýçli 100 zenany” sanawynda ýeke türk zenanyň ýene-de Güler Sabanjynyň bardygyny okyjy köpçüliginiň dykgatyna ýetirýär. Habarda geçen ýyl sanawda 60-njy orunda bolan Sabanjynyň şu ýyl 70-nji oruna geçendigi aýdylýar. Gazet Germaniýanyň Premýer ministri Angela Merkeliň bolsa yzly-yzyna eýýäm 5-nji gezek sanawyň 1-nji orundadygyna ünsi çekýär.

“Watan” gazeti: “Iň owadan aýlaw” söz başyly habarynda, bir tarapynda gadymy ýarym adanyň, beýleki tarapynda köprüleriň, köşkleriň, metjitleriň ýerleşýän we dünýäniň iň owadan aýlawlarynyň biri bolan "Turkcell Platinum Bosphorus Cup 2015" ýelken bäsleşiginiň ertir Stambulda başlaýandygyny mälim edýär. Gazet Ortaýer deňiziniň gündogarynda geçiriljek iň uly ýelken bäsleşigine 6 ýurtdan 50 töwrek türgeniň gatnaşjakdygyny ýazýar. Habarda bäsleşigi şäheriň käbir ýerlerinde stmbullylaryň seredip biljekdikleri we bäsleşigiň şäheriň tanalmagy üçin öz goşandyny goşjakdygy aýdylýar.