Türk metbugatynyň gysgaça mazmuny 15.07.2014

“Ýeni Şafak” gazeti “Jähennem meýilnamasy” söz başyly habarynda bir hepdeden bäri Gaza sektoryna ölüm ýagdyrýan we her gün onlarça palestinalyny şehit edýän Ysraýylyň indi bäbek, çaga, aýal, garry-ýaş diýmän hemmeleri ýok etjek “gyrgynçylyk” meýilnamasyny güýje girizendigini ýazýar. Gazet suwsyzlyk, açlyk we hassalyk arkaly köpçülikleýin gyrgynçylyk etmäge taýarlyk görýän Ysraýylyň goşunynyň, guryýer operasiýasyndan ozal 1,7 million palestinalynyň peýdalanýan suw arassalaýjy desgalaryny, elektrik we lagym ulgamlaryny hatardan çykarandygyny okyjy köpçüliginiň dykgatyna ýetirýär. Hassahanalarda dermanlaryň gutarandygyna, hassalaryň ölýändigine ünsi çekýän gazet, Gazanyň 75 göteriminiň elektrik togundan mahrumdygyny ýazýar.
“Star” gazeti “Ýetimleriň sany 62 müňe ýetdi” söz başyly habarynda Damaskyň Ýetimler jemgyýetiniň dolandyryjylar geňeşiniň başlygy Abdullah Dewrimin beýanatyna ünsleri çekýär. Gazet Abdullah Dewrimiň Siriýada ýetimleriň sanynyň 62 müňe ýetendigini aýdandygyny mälim edýär.
“Haber Türk” gazeti “Fransiýa bilen Türkiýäniň gatnaşyklary ýokary derejede” söz başyly habarynda, Fransiýanyň “14-nji iýul milli gününiň” Türkiýede-de bellenilip geçilendigini nygtaýar. Gazet dabaranyň Stambulyň Beýogly etrabynda ýerleşýän Fransiýa köşkünde Başkonsul Muriel Domenaçyň ýer eýeçiliginde geçirilendigini ýazýar. Habarda Türkiýe bilen Fransiýanyň arasyndaky gatnaşyklaryň soňky birnäçe ýylyň dowamynda ösmäge başlandygyna ünsi çeken Domenaçyň üstümizdäki aýyň ahyrynda Parižde iki ýurduň arasynda “Strategik Hyzmatdaşlyk” maslahatynyň geçiriljekdigini aýdandygy okyjy köpçüliginiň dykgatyna ýetirilýär.
“Sabah” gazeti “Awtomobiliň barlag we kämilleşdiriş merkezine öwrülýäris” söz başyly habarynda türk kömekçi awtomobil senagatynyň soňky 5 ýylda 1350 sany peýdaly model we 250-den gowrak patent çykarmagyň hötdesinden gelendigini okyjy köpçüligine mälim edýär. Gazet eksportdaky paýy 14 göterime golaý artan pudagyň, awtomil pudagynyň dinamosyna öwrülendigine ünsleri çekýär.
“Milliýet” gazeti “Türkiýede depginli ösüş isleýäris” söz başyly habarynda Türkiýäniň bazarynda depginli ösüş etmek isleýändigini aýdan “Pandoranyň” Türkiýedäki müdiri Anne Kolleniň “Pandora Türkiýede uly gelejek görýär. Türk sarp edijileriniň ýaş bolmagy, Pandoranyň elýeterli haryt öndürmegi bazarda mümkinçiligiň bardygyny görkezýär” diýen sözlerini ýerleşdirýär.