Gazagystan bilen Azerbaýjan diplomatik gatnaşyklaryň ýola goýulmagynyň 25 ýyllygyny belläp geçdi
Azerbaýjanyň Gazagystandaky ilçihanasynda berlen banketde iki ýurduň arasyndaky gatnaşyklaryň gün saýyn pugtalanýandygyna üns çekildi
Gazagystan bilen Azerbaýjanyň arasynda diplomatik gatnaşyklaryň ýola goýulmagynyň 25 ýyllygy dabaraly ýagdaýda bellenilip geçildi.
Azerbaýjanyň Gazagystandaky ilçihanasynda berlen banketde iki ýurduň arasyndaky gatnaşyklaryň gün saýyn pugtalanýandygyna üns çekildi.
Azerbaýjanyň Gazagystandaky Adatdan daşary we Doly ygtyýarly ilçisi Raşad Mamadowyň ýer eýeçiliginde ilçihanada berlen bankede Gazagystanda saparda bolýan Azerbaýjanyň Wise-prezidenti Ali Gasanow bilen birlikde daşary ýurtlaryň Gazagystandaky ilçileri, diplomatlar we jemgyýetçilik guramalarynyň wekilleri gatnaşdy.
Azerbaýjanyň Wise-prezidenti Gasanow çykyşynda Azerbaýjan bilen Gazagystanyň arasyndaky gatnaşyklaryň geçmişiniň taryhyň çuňluklaryna çenli uzap gidýändigini nygtady.
Gazagystan bilen Azerbaýjanyň arasyndaky gatnaşyklaryň durnukly ýagdaýda ösýändigine ünsi çeken Gasanow “Yzygiderli ýagdaýda guralýan iki taraply saparlar, parlamentleriň, ministrlikleriň, jemgyýetçilik guramalarynyň arasyndaky hyzmatdaşlyklar gatnaşyklaryň pugtalanmagyna itergi berýär” diýdi.
Gasanow ýokary derejeli syýasy gatnaşyklaryň ykdysady we söwda gatnaşyklaryna itergi berýändigini belledi.
Gasanow Baku-Tiblisi-Kars demir ýol liniýasynyň açylmagynyň we Gazagystandaky Aktau portunyň döwrebaplaşdyrylmagynyň iki ýurduň arasyndaky söwda gatnaşyklarynyň ösmeginde esasy rol oýnajakdygyna ünsi çekdi.
Gasanow iki ýurduň arasynda medeniýet we bilim pudagynda hem ýakyndan gatnaşyk edýändigini sözleriniň üstüne goşdy.
