Jumalykyzyk gezendeleri özüne çekýär

Türkiýäniň Marmara sebitinde taryhy özboluşlygyny gorap saklan, otantiki öýleri we köçeleri bilen ajaýyp obalardan biri: Jumalykyzyk… “Osman imperiýasy döwründe Anadolydaky oba durmuşy nähilidi?” diýýän gezendeleri özüne çekýär.

Jumalykyzyk Bursa şäheri bilen bilelikde 2014-nji ýylda ÝUNESKO-nyň Dünýäniň Miras Sanawyna goşuldy. Şol sebit Osman imperiýasynyň dörediliş döwrüne şaýatlyk etmegi taýdan möhüm…

“Bursa we Jumalykyzyk: Osman Imperiýasynyň Döreýşi” Dünýäniň Miras Giňişligi, Bursa şäherindäki 6 sany taryhy ýadygärligi öz içine alýar. Olar; “Orhangaziniň kompleksi we ýanaşyk ýerleri öz içine alýan Hanlar zolagy, Hudawendigar komleksi, Ýyldyrym kompleksi, Ýaşyl kompleks, Muradiýe kompleksi we Jumalykyzyk obasy…

Osman imperiýasynyň ilkinji paýtagty bolan Bursa 14-nji asyryň başyndan bäri sosial, medeni we söwda taýdan ösýär. Osman döwründe şäherde onlarça metjit, medrese, türbet, kerwensaraý, hammam, şypahana, ýapyk bazar gurulypdyr. Bursanyň şäherguluşyk modeli soňky döwürde gurlan Osman-türk şäherlerine görelde bolupdyr.

Bursanyň Dünýäniň miras sanawyna goşulmagyna sebäp bolan baý taryhy mirasy Anadoly döwletinden dünýä imperiýasyna uzap gidýän tapgyry beýan edýär.

Osman imperiýasynyň 700 ýyla golaý dowam eden döwründe gurlan binalar gelenleri taryhyň çuňluklaryna alyp gidýär.

Bursanyň şäher merkezine 13 kilometr alysda, Uludagyň eteginde ýerleşýän Jumalykyzyk obasy hem taryhy gurluşyny hem-de adaty ýaşaýyş durmuşyny biziň günlerimize çenli dowam etdirip gelýär. Ilkinji Osman binagärlik usulynda gurlan öýleri, ygally günlerde suwuň akyp gitmegi üçin ortasy kanal ýaly çekilen ýassy daşly köçeleri we ýadygärlik binalary bilen hamala diýersiňiz açyk muzeýi ýada salýar. Kerpiçden gurlan öýler, reňbe-reň diwarlar, köçeleriň ugrundaky çeşmeler sizi taryhyň çuňluklaryna alyp gidýär.

Jumlakyzyk her ýyl müňlerçe syýahatçy kabul edýän hem bolsa obada ekerançylyk dowam edýär. Obalylar öz önümlerini obanyň meýdançasynda satýarlar.

Bursa gelmek isleýän diňleýjilerimize; ajaýyp tebigy gözellige eýe bolan Uludagy görmegini, şypaly ýyly suwly sanatoriýalarda dynç almaklaryny, Bursa ýüpeginden almaklaryny, meşhur Iskender kebabyny, Kemalpaşa datlysyny we kaştan süýjüsini dadyp görmegi maslahat berýaris.