Ysraýyl Siriýa Howa Hüjümini Gurady

Ysraýylyň Siriýanyň paýtagty Damaska howa hüjümini gurandygy öňe sürüldi.

Siriýanyň resmi SANA habarlar gullugynyň berýän habaryna görä, düýn ýerli wagt bilen 18.05-de Ysraýylyň Damaskyň günortasyna howa hüjümini gurandygy öňe sürüldi.

Habarda, “Howa goranyş ulgamlarymyz duşmanyň Golan depeleri tarapyndan gelen raketalarynyň esasy bölegini urup düşürdi. Hüjümde maddi taýdan ýitgi çekildi” diýildi.

Beýleki tarapdan Ysraýyl tarapyndan mesele barada heniz hiç hili beýannama berilmedi.

Ysraýyl, içerki urşuň başlan ýyly bolan 2011-nji ýyldan bäri Siriýada wagtal-wagtal Eýran tarapyndan goldanýan toparlara we Siriýanyň harby goşunyna degişli harby merkezlere hüjüm guraýar.