Russiýanyň Demirgazyk Akyma garşy edilen sabotažyň derňelmek baradaky talaby kabul edilmedi

BMG-nyň Howpsuzlyk geňeşinde Russiýanyň talabyna laýyklykda sese goýulan kanun taslamasy 3 döwletiň oňyn sesine garşy 12 döwletiň ses bermekden saklanmagy sebäpli ret edildi. 

Kabul edilmegi üçin BMG-nyň Howpsuzlyk geňeşindäki 15 agzasynyň 9-syndan oňyn ses almagy zerur bolan kanun taslamasy, BMG-nyň Baş sekretarynyň halkara derejeli garaşsyz bir derňew komissiýasynyň döredilmegini talap edilýärdi, derňewiň giňişleýin, açyk we bitarap ýagdaýda sabotažy derňemegini göz öňünde tutýardy. 

Sabotažyň jogapkärleriniň, tarapdarlarynyň, gurnaýjylarynyň we jenaýat şärikleriniň ýüze çykarylmagyny maksat edinen kanun taslamasy, derňew işine bitarap we halkara derejede abraýa eýe bolan hünärmenleriň bellenmegini talap edýärdi. 

Kanun taslamasy BMG-nyň Baş sekretarynyň 30 günüň dowamynda netijelerini beýan etmegini özünde jemleýärdi. 

Russiýanyň hökümediniň metbugat geňeşçisi Dmitriý Peskow, Russiýanyň talabynyň BMG-nyň Howpsuzlyk geňeşinde kabul edilmezliginiň gynandyryjydygyny belläp: "Her kim bu terrorçylykly aksiýanyň guramaçylaryny we jogapkärlerini ýüze çykarjak ähli degişli taraplaryň gatnaşmagynda bitarap bir derňewe goldaw bermelidigini pikir edýäris" diýip belledi.

Bu meseläniň ýapylmagyna rugsat bermejekdiklerini aýdan Peskow, waka bilen baglanşykly halkara derňewiň geçirilmegi üçin ellerinden geleni etjekdiklerini mälim etdi.