Taliban, Owganystanda Daşary Ýurt Pul Birliginiň Ulanylmagyny Gadagan Etdi

Taliban ýurtda başdan geçirilýän ykdysady krizis sebäpli Owganystanda daşary ýurt pul birliginiň ulanylmagyny gadagan etdi.

Talibanyň metbugat geňeşçisiniň orunbasary Bilal Kerimi, metbugata beren beýannamasynda, ýurtdaky ykdysady ýagdaý we milli bähbitler sebäpli her bir adamyň owgan pul birligini ulanmagyny isleýändiklerini aýtdy.

Ýurtdaky her bir adamyň daşary ýurt pul birligini ulanmazlygyny isleýändiklerini aýdan Kerimi, daşary ýurt pul birliginiň ýurduň ykdysadyýetine ýaramaz täsirini ýetirýändigini we halka zeper ýetirýändigini nygtady.

Kerimi kabul eden karara garamazdan daşary ýurt pul birligini ulananlar hakynda işiň gozgaljakdygyny ýatlatdy.

Owganystanyň Merkezi banky 15-nji sentýabrda ähli raýatlardan owgan pul birliginiň ulanylmagy üçin çagyryş beripdi.

Talibanyň 15-nji awgustda paýtagt Kabuly gözegçiligi astyna almagyndan soň iki hepde ýapylan banklar, halka nagt pul bermekde kynçylyk çekýär.

Owganystandaky nagt pul ýetmezçiligi sebäpli halk banklardan hepdelik 20 müň afgani ýagny 200 dollar alyp bilýär.