Hytaýda ýüze çykan koronawirus epidemiýasy dünýä derejesinde ýaýraýar

Eýranyň saglygy goraýyş ministrliginiň resmisi Kiýanuş Jihanpur, ýene-de 15 adamda koronawirusyň anyklanandygyny, ýurtda wirusyň ýokan adamlaryň sanynyň şeýlelik bilen 43-e, ýogalan adamlaryň sanynyň bolsa 8-e ýetendigini habar berdi.

Kiýanuş Jihanpur, täze görnüş koronawirus epidemiýasy (Kovid-19) ýokan soňky 15 adamyň 7-siniň Kum, 4-siniň Tähran, 2-siniň Gilan, 1-iniň Merkezi we ýene-de 1-iniň Mazenderan welaýatlaryndandygyny mälim etdi.

Eýranyň ençeme welaýatynda koronawirus epidemiýasy Kovid-19 sebäpli bilime arakesme berildi.

Tähran, Kum, Erdebil, Elburz, Merkezi, Hemedan, Kazwin we Gilan welaýatlaryndan berilen beýanatlarda, wirusyň ýaýramagynyň öňüniň alynmagy maksady bilen başlangyç, orta mekdeplere, uniwersitetlere we dini bilim ojaklaryna dynç alyş berilendigi habar berildi.  

Käbir welaýatlarda 1 gün, käbirlerinde 2 gün, käbirlerinde bolsa 1 hepdäniň dowamynda bilime arakesme berilendigi we ol möhletleriň uzaldylyp bilinjekdigi beýan edildi.

Ýurtdaky ähli sport çäreleri 10 günlügine yza süýşürildi, ähli sungat we medeni çäreler goý bolsun edildi.

Kuweýt raýatlaryny Eýrandan çykarmaga başlady.

Kuweýt Eýrandaky raýatlaryny çykarmak üçin üpjün eden 5 uçaryň 1-i 130 ýolagçy bilen birlikde ýurda gaýdyp geldi.

Günorta Koreýada bolsa koronawirusyň ýokan adamlaryň sany 602-ä ýetdi.

Häzirki wagta çenli 5 adamyň ýogalan ýurtda, taýarlyk derejesi ýokary çäge çykaryldy.

Günorta Koreýanyň Döwlet baştutany Mun Dže In, täze görnüş koronawirus epidemiýasyna (Kovid-19) garşy göreşde öňümizdäki birnäçe günüň möhümdigini belläp, hökümetiň taýarlyk derejesiniň gyzyla çenli çykarylandygyny we öňüni alyş çäreleriň artdyryljakdygyny habar berdi.  

Ysraýyl, Günorta Koreýanyň paýtagty Seuldan uçar bilen gelen takmynan 200 adamyň Tel-Awiwdäki Ben Gurion howa menziline girmegine rugsat bermedi.

The Jerusalem Post gazediniň berýän habaryna görä, şol bir uçar bilen gelen 12 ysraýylly bolsa tiz kömek ulaglar bilen öýlerine alynyp gidildi.  

Hindistan hem täze görnüş koronawirus epidemiýasyny (Kovid-19) öňüni almak maksady bilen raýatlaryndan gyssagly bolmadygy saýyn Singapura syýahat etmekden saklanmaklary barada duýduryş berdi.

Täze görnüş koronawirus epidemiýasynyň (Kovid-19) dünýä derejesinde ýokan adamlaryň sany şeýlelik bilen 79 müňe ýetendigi aýan edildi.

Hytaýyň metbugaty wirusyň inkubasion etabynyň 27 güne ýetip bilýändigini öňe sürdi.

Uhan şäherindäki sykawlaryň birinde inkubasion etabynyň 27 gün hökmünde kesgitlenendigi beyan edildi.

Bütindünýä Saglygy goraýyş guramasy, halkara jemgyýete çagyryş berip, wirusyň ýaýran, esasan hem saglygy goraýyş ulgamy gowşak bolan ýurtlarda ulanylmak maksady bilen 675 million dollar pul kömeginiň berilmegini isledi.