Gündogar Gutadaky hüjümler dowam edýär

Siriýada Başar Asada bagly güýçleriň we olara goldaw berýän toparlaryň BMG-nyň Howpsyzlyk geňeşiniň kararyna we Russiýa tarapyndan yglan edilen 5 sagatlyk ynsanperwer arakesmä garamazdan Gündogar Gutanyň tapawutly ýerlerine guran hüjümlerinde asuda ilatdan ýene-de 28 adam ýogaldy.

Asada tabynlykdaky güýçleriň we rus uçarlarynyň Hammuriýe diýilen ilatly zolaga guran hüjümlerinde aglabasy zenanlardan we çagalardan ybarat 20 adam ýogaldy.

Düýn irden Gündogar Gutanyň tapawutly ýerlerine guralan hüjümlerde Sakbada 4, Jisrinde 3 we Harestada 1 adam ýogaldy.

Ýaralanalar raýat goranyş toparlary tarapyndan sebitdäki saglygy goraýyş merkezlerine alynyp gidilip, dowam edýän hüjümler sebäpli ýogalanlaryň sanynyň artmagyna alada bildirilýär.

Asada bagly güýçler gabaw astyndaky Gündogar Gutanyň Sakba we Hammuriýe etrapçalarynda bolsa ilatly zolaklara zäherli gaz bilen hüjüm guradylar.

Asada bagly güýçleriň we tarapdarlarynyň oppozisionerleriň gözegçiligi astyndaky Gündogar Guta 19-njy fewral-6-njy mart aralygynda guran howa we gury ýer hüjümlerinde 834 adam ýogaldy.

Düýnki hüjümler bilen birlikde soňky 17 günde ýogalan adamlaryň sany 862-ä ýetdi.