“Siriýa serhedinde raýatlarynyň howpsyzlygyny üpjün etmek boýunça Ankaranyň aladalaryna düşünýäris”

ÝB-niň Daşary gatnaşyklar we Howpsyzlyk syýasatlary boýunça ýokary wekili Federika Mogerini Siriýa serhedinde raýatlarynyň howpsyzlygynyň üpjün etmegiň Türkiýäniň hukugy we borjydygyny, Ankaranyň aladalaryna düşünýändiklerini aýtdy

Ýewropa Parlamentiniň Fransiýanyň Strazburg şäherinde dowam edýän sessiýasynda Türkiýe we Afrin temaly diňlenşik geçirildi.

Mogerini ol ýerde eden çykyşynda Siriýada dowam edýän “Zeýtun Şahajygy” operasiýasy we Türkiýedäki soňky wakalar barada durup geçdi.

“Türkiýe bilen hyzmatdaşlygymyzda elmydama dogruçyl we aç-açan bolduk. Türkiýäniň agyr synaglardan geçýändigini kabul edeliň. Terrorizm, duýdansyz agdarlyşyk synanşygy, bosgunlar meselesi we serhet aşa uruş. Serhetlerde başdan geçirilýänler bilenbirlikde biz Türkiýäniň aladalaryna düşünýäris. Türkiýäniň Siriýa serhedinde ýaşaýan raýatlarynyň howpsyzlygyny üpjün etmek hukugy we borjydyr” diýen Mogerini, täze frontyň açylandygyny we ynsanperwer kömekleriniň ýetirilmegi, asuda ilatyň goralmagy üçin ünsli çemeleşilmelidigini beýan etdi.

Türkiýäniň Siriýadaky harby operasiýa başlan gününden bäri wakalar bilen ýakyndan gyzyklanýandyklaryny nygtan Mogerini: “Demirgazyk Siriýada açylan täze fronta uly alada bildirýäris. Ähli zatdan ozal gumanitar sebäplerden aladalanýarys” diýdi.

Mogerini çaknyşyklaryň Siriýadaky içerki deňagramlyklary bozup biljekdigini beýan edip: “Dartgynlygyň möwjemegi çaknyşyklara syýasy çözgüt tapmaga mejbur edip biler. Ähli energiýamyzy Ženewadaky gepleşiklerde BMG-na goldaw üçin sarp edeliň. Ähli aladalary ortadan aýrylmaly. Siriýadaky uruş gutarmady. Adamlar ölmäge dowam edýär” diýdi.

ÝB-niň Türkiýe bilen aragatnaşygy has-da güýçlendirjekdiklerini nygtan Mogerini: “Gatnaşyk ugurlarynyň ählisi açyk bolar. Düşnüşmezlikleri ortadan aýyrarys. Bilelikde çözgüt tapmak üçin işläris. Ony özümiz üçin bolşy ýaly türk halky üçin hem ederis” diýdi.