Daşary ýurt metbugatyna syn 02.03.2016

Britaniýada çap edilýän “Al Kuds Al Arabi" gazeti “Türkiýäniň Afrika materigindäki täsiri" söz başyly habarynda Türkiýäniň Afrika ýurtlary bilen edýän gatnaşyklarynyň gün saýyn güýçlenýändigini ýazýar.

Gazet Türkiýäniň Afrika ýurtlary bilen syýasy we ykdysady taýdan edýän gatnaşyklarynyň pugtalanmak bilen dowam edýändigini we şol gatnaşyklaryň Türkiýäniň sebitara we halkara derejesinde täsiriniň ýokarlamagyna sebäp bolýandygyny nygtaýar.

Gazet şol gatnaşyklaryň çäginde ýaňy ýakynda Somalide türk harby bazasynyň açylandygyny ýatladýar.

Gazet Prezident R. T. Erdoganyň Afrika ýurtlaryna guraýan saparynyň çäginde Türkiýe bilen Pildişi kenarynyň arasynda 9 şertnama gol çekişilendigini belleýär.

Fransiýanyň AFP habarlar gullugy “Türkiýede 150 müňden gowrak siriýaly bäbek dünýä indi" söz başyly habarynda Wise-premýer Lütfi Elwanyň BMG-nyň Adam hukuklary geňeşiniň Ženewada geçirlen ýyllyk maslahatynda eden çykyşynda “Türkiýede doglan siriýaly bäbekleriň sany 152 müňe ýetdi" diýendigini mälim edýär.

Habarda Wise-premýer Elwanyň Türkiýäniň 2,7 million siriýaly bosguny kabul edendigine aýratyn ünsi çekendigi bellenildi.

Habarda Türkiýäniň içerki uruş sebäpli başdan geçirilýän adamzat krizisiniň esasy böleginiň hötdesinden gelmek üçin elinden geleni edýändigini aýdan Lütfi Elwanyň, dünýäniň galan bölegine Siriýadaky adamzat krizisinde jogapkärçilikli hereket etmekleri üçin çagyryş berendigi nygtaldy.

Germaniýadan ýaýlym berýän Doçe Wella radiosy “Russiýa bosgunlary Ýewropa garşy ýarag hökmünde ulanýar" söz başyly habarynda NATO güýçleriniň serkerdesi general Filip Breedlowe Siriýaly bosgun akymynyň Ýewropada durnuksyzlyga sebäp bolan täsiriniň resmi Moskwa tarapyndan ulanylýandygy hakyndaky sözlerine ýer berdi.

Amerikan senadynda çykyş eden general Breedlowe Russiýanyň we Siriýanyň hökümetiniň bosgun akymlarynyň güýçlenmegi üçin bilkastlaryn howa hüjümlerini guraýandygyny we barrel bombasyny ulanýandygyny nygtady..

General Breedlowe Russiýanyň ABŞ-nyň ýaragly güýçleri üçin hem wehim ýagdaýyna gelendigini ýatlatdy.

Ukrainanyň habarlar gullugy “Ýewrowideniýe aýdym saz bäsleşiginde Ukrainanyň adyndan bäsleşjek Žamala Türkiýä aşyk" söz başyly habarynda Şwesiýanyň paýtagty Stokgolda maý aýynda geçiriljek 61-nji Ýewrowideniýe aýdym saz bäsleşiginde tatarlaryň ruslar tarapyndan sürgün edilşini gürrüň berýän “1944" atly aýdymy bilen Ukrainanyň adyndan bäsleşjek Žamalanyň dogan garyndaşlarynyň Stambulda ýaşaýandygyny mälim etdi.

Habarda “Türkiýäni we türk halkyny halaýaryn" diýen Žamalanyň Türkiýede konsert programasy bilen çykyş etmek isleýändigi bellenildi.