Ýapyk binalarda we söweş sungaty boýunça V Aziýa Oýunlary

2017-nji ýylyň maý aýynyň 10-da Türkmenistanyň Türkiýe Respublikasyndaky İlçihanasy Ýapyk binalarda we söweş sungatý boýunça V Aziýa oýunlaryna görülýän taýarlyklar we Türkmenistanyň energetika syýasaty boýunça metbugata brifing berdi. Brifingde çykyş eden Türkmenistanyň Türkiýedäki Adatdan daşary we Doly ygtyýarly ilçisi İşanguly Amanlyýew, ýurtda Aziýada 2017-ä görülýän taýarlyklar, oýunlaryn Nyşany, Tumary, Şekili hem-de ýurduň energetika syýasaty boýunça giňişleýin maglumat berdi.

Brifingde 2010-njy ýylyň dekabr aýynda Kuweýdiň paýtagty Al Kuweýt şäherinde Aziýanyň Olimpiýa Komitetiniň (AOK) merkezi ofisinde AOK-niň, Türkmenistanyň Milli Olimpiýada Komitetiniň we Aşgabadyň şäher häkimliginiň 2017-nji ýylyň sentýabr aýynda Türkmenistanyň paýtagtynda Ýapyk binalarda we söweş sungatý boýunça V Aziýa oýunlarynyn geçirilmegi barasynda ylalaşylandygy ýatladyldy.

Elbetde AOK-niň bu kararynyň Türkmenistanyň Prezidenti Gurnanguly Berdimuhamedowyň liderlik etmegindäki sportyň hem-de beden terbiýäniň ösdürilmegi, ýurduň sport boýunça abraýynyň göterilmegi ugrundaky alyp barýan işleriniň parlak netijesidigi nygtaldy.

Türkmenistanyň Ýapyk binalarda we söweş sungatý boýunça V Aziýa oýunlaryna görýän taýarlyklarynyň has irräk başlandyğyna üns çekilen brifingde, Aşgabatdaky Olimpiýa şäherçesiniň düýbüniň 2010-njy ýylyň 5-nji noýabrynda tutulandygy habar berildi.

Türkmenistan halkara derejesindäki uly sport çaresine düýpli taýarlyk görüp, onuň dowamynda türkmen göreşi hem-de çapyksuwarlyk ugurlary boýunça bäsleşikleriň geçirilmegini teklip etdi we ol kabul edildi.

2016-njy ýylyň 5-nji maýynda Ýapyk binalarda we söweş sungatý boýunça V Aziýa oýunlaryna 500 gün galanda 17 çapyksuwardan ybarat bolan topar ýurduň bäş welaýatynyň her haýsynda 100 günlük ýörişe çykdylar. Atlylar olimpiýa oýunlarynyň başlajak güni, ýagny 2017-nji ýylyň 17-nji Sentýabrynda sagat 17:00-da Aşgabada dolanyp gelerler.

Ýapyk binalarda we söweş sungaty boýunça V Aziýa oýunlarynyň Nyşany

2017-nji ýylyň sentýabrynda Aşgabatda guraljak Ýapyk binalarda we söweş sungaty boýunça V Aziýa oýunlarynyň nyşany çuňňur many-mazmuny özünde jemleýän birnäçe şekillerden ybaratdyr. 

Ahalteke bedewi türkmen halkynyň milli gymmatlygy, dünýä medeniýetine goşan ägirt uly goşandydyr. Ahalteke bedewi bütin dünýäde özüniň ýyndamlygy, üşükliligi, çydamlylygy we haýran galdyryjy gözelligi bilen tanalýar. V Aziýa oýunlarynyň nyşanynda ýerleşdirilen ahalteke bedewiniň şekili sagdynlygy alamatlandyrýar. 

Nyşanda ýerleşdirilen ýarymaýyň şekili Türkmenistanyň Döwlet baýdagyndan nusga hökmünde alyndy. Täze dogan Aý täze başlangyçlaryň, aýdyň maksatlaryň, iň esasy-da, ruhubelentligiň keşbini özünde jemleýär. 

V Aziýa oýunlarynyň nyşanyndan orun berlen ýyldyzyň şekili Aziýanyň Olimpiýa Geňeşiniň baýdagyndan nusga hökmünde alyndy. Aziýa ýurtlarynyň ählisiniň sport nyşany bolan bu ýyldyzyň şekili dostlugyň aňlatmasy bolup çykyş edýär. 

Şeýlelikde, bu şekilleriň we olardaky reňkleriň ählisi birleşip, V Aziýa oýunlarynyň nyşanyny emele getirmek bilen, Aşgabat Aziadasynyň “Sagdynlyk. Ruhubelentlik. Dostluk” şygaryny hem alamatlandyrýar. Nyşanyň umumy aýlaw şekili agzybirligiň, jebisligiň we oňyn hyzmatdaşlygyň alamaty hökmünde ýerleşdirildi.

Ýapyk binalarda we söweş sungaty boýunça V Aziýa oýunlarynyň Tumary

Paýtagtymyz Aşgabatda geçiriljek Ýapyk binalarda we söweş sungaty boýunça V Aziýa oýunlarynyň tumarynda türkmen halkynyň köpasyrlyk geçmiş taryhy hem-de baý medeni mirasy çeper beýan edildi. 

Geçmişde türkmen topragy beýik Ýüpek ýolunyň çatrygynda, amatly ýerde ýerleşmek bilen, bütin sebitde we dünýäde söwdanyň, ylym-bilimiň, medeniýetiň we döredijilik pikirleriniň pajarlap ösmegine uly goşant goşandyr. 

Tumaryň esasy mazmunyny düzýän Beýik Ýüpek ýolundan barýan kerwenler, ak öýler, alabaý iti we türkmen bagşysy, milli türkmen göreşi, türkmen topragynda gülläp ösen gadymy medeniýetleriň nyşany bolan ýadygärlikler, ýyndam ahalteke bedewi, sahawatly türkmen topragyndan önýän pagta, bugdaý, gawun... — bularyň ählisi şu günümiziň ajaýyp keşbi bilen sazlaşýar. Tumaryň häzirki döwrümizi aňladýan böleginde gözel paýtagtymyzda we Hazar deňziniň türkmen kenaryndaky Awazada gurlan milli öwüşginli döwrebap binalaryň şekilleri hem orun aldy. Tumaryň ugry uçup barýan guşuň şekilini aňladýar, bu ýurdumyzyň beýik maksatlara tarap joşgunly ymtylyşynyň nyşanydyr. Ýapyk binalarda we söweş sungaty boýunça V Aziýa oýunlarynyň tumary baý we myhmansöýer türkmen kalbynyň özboluşly beýanydyr. 

Ýapyk binalarda we söweş sungaty boýunça V Aziýa oýunlarynyň Şekili

Ýapyk binalarda we söweş sungaty boýunça V Aziýa oýunlarynyň şekili hökmünde türkmen alabaýynyň keşbi saýlanyp alyndy. Alabaý türkmen durmuşynda maşgala ojagynyň, abadançylygyň goragçysy bolup durýar. Ol ynsana ýakyn dost, eýesine wepaly, sürini, öýi, emlägi sak durup goraýjy, batyr, gaýduwsyz, buýsançly. Şu nukdaýnazardan, V Aziýa oýunlarynyň şekili bolup durýan alabaýa Wepaly diýip at dakyldy. 

Wepaly dogruçyl, adalatly we aýgytly hereket etmegiň, garşydaşy ýeňmegiň — ýeňşiň yşaratydyr. Ol göreşlerde pälwan, toýlarda şadyýan, hünärde ezber, her bir işde janypkeş türkmen türgenlerini öz gaýratlylyk, gaýduwsyzlyk, edermenlik ýörelgesine eýerdip, V Aziýa oýunlarynda sport ýeňişlerine alyp gider. 

Wepalynyň milli geýimleri onuň özboluşlylygynyň üstüni ýetirýär. 

Brifingde sözlerini Türkmenistanyň energetika syýasaty boýunça dowam etdiren ilçi I. Amanlyýew; Soň ýyllarda, esasanda 10 ýýlyň dowamda ýurduň lideri Gurbanguly Berdimuhamedowyň başlangyçlary bilen energiya serişdeleriniň howpsylygy barada BMG-da möhüm kararlaryň kabul edilendigine ünsi çekdi.

Ýaponiýanyň paýtagty Tokioda Energetika Hartiýasy boýunça maslahatyň 27-nji mejlisi geçirilendigi, onda Türkmenistan bu iri halkara guramasynyň başlygy diýlip yglan edilendigi brifinge gelenleriň dykgatyna ýetirildi.

“Bu ýurdumyzyň halkara derejesinde ýokary abraýynyň we hormatly Prezidentimiz Gurbanguly Berdimuhamedow tarapyndan durmuşa geçirilýän daşary syýasatyň ählumumy goldawynyň nobatdaky aýdyň subutnamasydyr. Halkara energetika hyzmatdaşlygy bu syýasatyň möhüm ugrudyr” diyip ilçi I.Amalyýew belledi.  

Täze hem-de netijeli çözgütleri gözlemekde işjeň garaýyşlary bilen hemişe tapawutlanýan Türkmenistanyň energetika diplomatiýasynyň dünýä işewürleriniň we bilermenler jemgyýetçiliginiň wekilleriniň arasynda uly gyzyklanma döredýändiginiň ýene bir aýdyň görkezijisi bolup durýar.

Türkmenistan Energetika Hartiýasynyň düýbüni tutujy taraplaryň biridir, şonuň üçin hem Türkmenistanyň başlyklyk etmegi ilkinji nobatda halkara energetika hyzmatdaşlygyny ösdürmäge we pugtalandyrmaga, dünýä energetikasynyň ösüşiniň derwaýys meselelerini ara alyp maslahatlaşmak üçin hil taýdan täze, çekişmeler meýdançasyny emele getirmäge hem-de Türkmenistanyň Prezidenti Gurbanguly Berdimuhamedow tarapyndan öňe sürlen hem-de BMG-niň Baş Assambleýasy tarapyndan kabul edilen, onlarça ýurduň awtordaş bolup çykyş eden degişli kararnamasyny iş ýüzünde durmuşa geçirmek bilen baglylykda, ählumumy durnukly ösüşiň aýrylmaz bölegi hökmünde ählumumy energetika howpsuzlygyny üpjün etmäge gönükdirilendir.

Bu halkara guramasyna ýolbaşçylyk etmek bilen Türkmenistan ägirt uly serişde kuwwatyny tutuş adamzadyň bähbidine goýmaga çalyşar hem-de bu ugurda ýangyç-energetika toplumyny döwrebaplaşdyrmak hem-de energiýa serişdelerini dünýä bazarlaryna çykarmagyň ýollaryny diwersifikasiýalaşdyrmak ýörelgelerine esaslanýan bu ulgam boýunça syýasaty durmuşa geçirýär.

Energetika meseleleriniň ählumumy häsiýeti energetika ugruny türkmen diplomatiýasynyň binýatlaýyn esaslarynyň hataryna goşdy. Halkara energetika howpsuzlygyny üpjün etmäge Türkmenistanyň iri energetika serişdelerini iberiji hökmünde gatnaşmagy munuň wajyp ugry boldy.