یوسف دیکچ ایله ایلان ماسکین یازیشماسی گوندم اولدو

تورکیه‌نین المپیک مدالی آلان میللی آتیچیسی یوسف دیکچ، گونلردیر سوسیال مئدیانین گوند‌مینده...

۲۰۲۴ پاریس المپیک اویونلاریندا ۱۰ متر هاوالی تاپانچا قاریشیق تیم یاریشیندا شووال ایل‌آیدا تارحان ایله بیرلیکده تورکیه‌یه گوموش مدال گتیره‌ن میللی آتیچی یوسف دیکچ، سوسیال مئدیادا ان چوخ دانیشیلان آدلار آراسیندا.

تجهیزاتدان ایستیفاده ائتمه‌دن، اللری جیبینده ائتدیگی باشاریلی آتیشلارلا بوتون دونیانین ماراغینی چکه‌ن میللی ایدمانچی، بو دفعه مشهور ایش اینسانی ایلان ماسک ایله یاشادیغی دیالوگلا گوند‌مده.

ایلان ماسکین صاحبی اولدوغو سوسیال مئدیا پلتفورمو اکسده قیسا مدت اؤنجه حساب آچان دیکچ، سوسیال مئدیا حسابی اوزریندن ماسکا ماراقلی بیر سوال وئردی.

دیکچ، فنومن اولان آتیش پوزو ایله ائتدیگی پایلاشیمدا ماسکی ائتیکتله‌یه‌رک،

"سلام ایلان، سیزجه گلجه‌یین روباتلاری اللری جیبلرینده المپیک اویونلاریندا مدال قازانا بیله‌جکلر می؟ بونو قاره‌لری بیرلشدیره‌ن مدنیت باشکندی ایستانبولدا دارتیشماغا نه دئیرسینیز؟" سؤزلری ایله، مشهور ایش اینسانینی ایستانبولا دعوت ائتدی.

ماسکین جاوابی ایسه گئجیکمه‌دی.

"روباتلار هر سفرینده هدفی تام اورتاسیندان ووراجاق" دئیه‌ن ماسک،

"ایستانبولا سفر ائتمک ایسته‌ییرم. دونیانین ان گؤزل شهرلریندن بیری" ایفاده‌لریندن ایستیفاده ائتدی.

ماسک، دیکچین سوسیال مئدیا حسابینی تعقیبه ده باشلادی.

ماسک و دیکچین آراسیندا گئچه‌ن دیالوگ، میلیونلارجا کز بگه‌نیلیب و پایلاشیلدی.