فوتبال دونیاسی یاسدا
اینگیلیس پلیسی جسدین سالایا عاید اولدوغونو آچیقلادی
آرژانتینلی فوتبالچی امیلیانو سالا و پیلوتون ایچین‌ده اولدوغو اوچاغین داغینتیسی تاپیلمیش و ایچیندن کیملیگی بیلینمه‌ین جسد چیخارمیشدی.
اینگیلیس پلیسی جسدین سالایا عاید اولدوغونو بللی ائتدیکلرینی آچیقلادی.
فرانسانین نانت شهرین‌دن ولزین مرکزی کاردیفه دوغرو ژانویه‌نین ۲۱ینده یولا چیخان ایکی نفرلیک اوچاق مانش دنیزی اوزرینده یوخا چیخدی.
۴ فوریه‌ده ایسه اوچاغین داغینتیسی ایله بیرلیک‌ده بیر جسد تاپیلمیشدی.
اینگیلتره‌نین گونئی دوغوسونداکی دورست پلیسی، دنیزدن چیخاریلان جسدین ۲۸ یاش‌لی ائمیلیانو سالایا عاید اولدوغونا دایر بیر یازی‌لی آچیقلاما وئردی.
بو خبرین آردین‌دان فوتبال دونیاسی بیر داها یاسا بوغولدو.
سالانین اسکی کلوبو نانت و ترانسفر اولدوغو کاردیف سیتی باش‌دا اولماقلا فوتبالچی اوچون بیر چوخ یئردن باش‌ساغ‌لیغی مئساژی یاییملاندی.
اوچاغین راداردان ایتمه‌سین‌دن سونرا باشلادیلان آختارما قورتارما ایشلری اوچ گون سونرا باشا چاتدیریلمیش، امیلیانو سالانین عائله‌سی و بیر چوخ مشهور فوتبالچی طرفین‌دن مالیه‌لشدیریله‌ن اؤزل آختارما اکیبی ایشلری داوام ائتدیرمیشدی.
