قیزیل میدال تورک میللی گولشچی طاها آک‌گولون

تورکیه میللی گولشچی طاها آک‌گول، تورکیه‌یه 2016 ریو اولیمپیا اویونلارینداکی ایلک قیزیل میدالینی قازاندیردی.

برزیل‌ین ریو دو ژانیرو شهرین‌دکی کاریوکا آرئنادا ائدیلن کیشی‌لر آزاد ایستیل گولش 125 کیلو فینالیندا، سون ایکی ایلین دونیا شامپیونو طاها آک‌گول ایله سون اولمپیادا اوچونجوسو ایران‌لی کمیل نعمت قاسمی قارشیلاشدی.

فینالدا قاسمی‌نی 3-1 مغلوب ائدن طاها آک‌گول، کاریئری‌نین ایلک اولمپیادا قیزیل میدالینی الده ائتدی. ریو 2016دا ایلک قیزیل میدالینی قازانان تورکیه، گولشده 5، جمعده ده 8 میدالا چاتدی.

قارشیلاشمانین آردین‌دان غالیبیتینی دؤشکه گلن گنج‌لیک و ایدمان ناظیری آکیف چاغاتای قیلینج ایله قید ائدن طاها آک‌گول، تورک بایراغییلا ظفر دؤورو آتدی. میللی ایدمانچی سونرا تریبوندکی آنا و آتاسی‌نین یانینا گئده‌رک سئوینجینی پایلاشدی.

ایلک تورو اویون ائتمه‌دن کئچن طاها، ایکینجی توردا مغول جولونبات ژارگالسایخان، دؤرددبیر فینالدا بلاروس‌لو ایبراهیم سایداو قارشی‌سیندا سایی اوستونلوگویله غالیب گلمیش، یاری فینالدا دا ارمنی لئوان بریانیدزیی 3-1 مغلوب ائده‌رک فینالا قالمیشدی.

کیشی‌لر آزاد ایستیل 125 کیلودا بورونج میدال‌لار ایسه بلاروس‌لو ایبراهیم سایداو و گورجو گئنو پتریاش‌ویلی‌نین اولدو.