ایران جومعه گونو یئنی‌دن صاندیق باشینا گئده‌جک

یران جومعه گونو تیر آیی‌نین ۱۵-نده یئنی‌دن صاندیق باشینا گئده‌جک.

ایراندا گئچن جومعه گونو کئچیریلن جومهور باشقانلیغی سئچکیسینده یاریشان دؤرد نامیزددن هئچ بیری سسلرین یوزده ۵۰+۱ نی توپلایا بیلمه‌ییب.

بونون اوچون ایران میللتی بو جومعه جومهور باشقانلارینی سئچمک اوچون یئنی‌دن صاندیق باشینا گئده‌جک‌لر.

ایران داخیلی ایشلر ناظیرلی‌یینین سئچکی مرکزینین سؤزجوسو مؤحسون ایسلامی کئچیردیگی مطبوعات کنفرانسیندا بو اؤلکه‌ده اون دؤردونجو جومهور باشقانلیقی سئچکیلری مودتینین ایکینجی تورا قدر اوزادیلدیغینی آچیقلاییب.

سئچکیلرین ایلک دورونده ۴ نامیزددن هئچ بیری سس چوخلوغونو قازانا بیلمه‌ییب، بونا گؤره ده بیرینجی دؤرده، ایلک ایکی یئری توتان نامیزدلر آراسیندا سئچکیلرین ایکینجی دؤرونون تیر آیی‌نین ۱۵-نده کئچیریله‌جه‌یینی بیلدیریب

آچیقلانان نتیجه‌لره گؤره، بیرینجی دؤرده آذربایجان تورکو اولان و ایصلاحاتچی‌لار طرفیندن ده نامزد گورسه‌دیلن مسعود پزشکیان ۱۰ میلیون ۴۱۵ مین سسله ان چوخ سس توپلاییب، اؤلکه‌نین تحلوکه‌سیزلیک شورا نوماینده‌سی سعید جلیلی ایسه ۹ میلیون ۴۷۳ مین سسله ایکینجی اولوب.

سئچکیلرین بیرینجی دؤرونده ایشتیراک نیسبتی ایسه ساده‌جه یوزده ۴۰ دا قالیب.