تورکیه و عمان آراسیندا 10 یئنی امکداشلیق سندی ایمضالاندی
جمهور باشقانی رجب طیب اردوغان غزه زولاغیندا عاجیل و عدالتلی آتیشکسین بولگهسل و گلوبال باریش اوچون ضروری اولدوغونو وورغولادی.
جمهور باشقانی رجب طیب اردوغان بیلدیریب کی، "غزه زولاغیندا عاجیل، عدالتلی و قالیجی آتیشکس تامین ائدیلمهدن بولگهسل و گلوبال باریشا نایل اولا بیلمهیهجگیمیزی خصوصی اولاراق قئید ائتمک ایستییرم."
جمهور باشقانی اردوغان، رسمی سفرله پایتاخت آنکارایا گلن عمان سلطانی هیثم بن تاریک ایله باش باشا و نوماینده هئیتلری آراسیندا کئچیریلن گؤروشدن سونرا بیرگه مطبوعات کنفرانسی تشکیل ائدیب.
عمان سلطانی هیثم بن تاریکی تورکیهده مسافر ائتمکدن ممنونلوق دویدوغونو ایفاده ائدن اردوغان بونلاری دئییب:
"عمان ایله درین تاریخی و قارداشلیق باغلارینا اساسلانان علاقهلریمیز بوتون ساحهلرده اینکیشاف ائتمکده داوام ائدیر. دگرلی قارداشیملا بیرلیکده موناسیبتلریمیزی هر ساحهده داها دا ایرهلی آپارماق ایستییریک."
گؤروشلر زامانی موختلیف ساحهلری احاته ائدن علاقهلرین داها دا گوجلندیریلمهسی اوچون آتیلا بیلهجک آددیملاری موذاکیره ائتدیکلرینی وورغولایان اردوغان بونلاری پایلاشیب:
"موناسیبتلریمیزه قورومسال چرچیوه قازاندیرماق ایستییریک. بو مقصدله یوکسک سویهلی ایستراتژی امکداشلیق مکانیزمی داخیل اولماقلا موختلیف پرسپکتیولری موذاکیره ائتدیک. خاریجی علاقهلر، اقتصادیات، صنایع، یاتیریم، ساغلیق، مدنیت، تاریم و حیواندارلیق کیمی ساحهلرده امکداشلیغی اینکیشاف ائتدیرمک اوچون 10 سند ایمضالاندی. بیرگه بیانات قبول ائدیلدی."
جمهور باشقانی اردوغان، لبناندا آتیشکسین تامین اولونماسینا یؤنلمیش دانیشیقلارین مثبت نتیجهلرینی ممنونیتله قارشیلادیقلارینی قئید ائدهرک علاوه ائدیب:
"اؤلکهمیزین لبناندا باریش و ثابیتلیگین تامین اولونماسیندا هر جور دستک وئرمهیه حاضیر اولدوغونو بیر داها وورغولاییرام. آنجاق غزه زولاغیندا عاجیل، عدالتلی و قالیجی آتیشکس تامین ائدیلمهدن بولگهسل و گلوبال باریشا نایل اولا بیلمهیهجگیمیزی خصوصی اولاراق قئید ائتمک ایستییرم. امریکا پرزیدنتی جو بایدنین غزهده آتیشکس اوچون یئنی تشببوس باشلاداجاغینی آچیقلاماسی گئجیکمیش، لاکین مهم آددیمدیر. غزهده ساکیتلیک و باریشین تامین اولونماسی اوچون اوزریمیزه دوشنی ائتمکدن چهکینمهیهجییک."
عمان سلطانی هیثم بن تاریک ایسه بوتون طرفلرین اورتاق آرزوسونون بؤلگهده تهلوکهسیزلیک و ثابیتلیگین تامین اولونماسی اولدوغونو ایفاده ائدهرک دئییب:
"بولگهسل امکداشلیغی گوجلندیرمک اوچون ال-اله وئرهرک چالیشمالیییق. بو باخیمدان عمان اولاراق بؤلگهمیزی ماراقلاندیران اولوسلار آراسی مسئلهلرده تورکیهنین موضعینی و یاناشماسینی دستکلدیگیمیزی بیلدیرمک ایستییریک."
ایلگیلیلی خبرلر
عمر بولات و اسلوونیا باش ناظیرینین معاوینی تانیا فاجون ایله گؤروشدو
تورکیه تیجارت ناظیری عمر بولات و اسلوونیا باش ناظیرینین معاوینی تانیا فاجون ایله گؤروشدو.
