تورکیه فیلیسطینده باریش و آتیشکس اوچون سعیلرینی داوام ائتدیرهجک
تورکیه، فیلیسطینده آتیشکسین تامین اولونماسی ایستیقامتینده چالیشمایا داوام ائدهجک.
تورکیه، فیلیسطینده آتیشکسین تامین اولونماسی ایستیقامتینده چالیشمایا داوام ائدهجک. خاریجی ایشلر ناظیرلیگی، ایسپانیانین پایتاختی مادریدده کئچیریلن فیلیسطین قونولو توپلانتی ایله باغلی یازیلی آچیقلاما وئریب.
آچیقلامادا قئید اولونور کی، خاریجی ایشلر ناظیری هاکان فیدان، ایسلام امکداشلیق تشکیلاتی و عرب بیرلیگی تماس قروپونون دیگر عضولری ایله بیرلیکده، ایسپانیا، اسلوونیا، نروژ، ایرلاندیا و آوروپا بیرلیگینین ده قاتیلدیغی توپلانتییا ایشتیراک ائدیب. توپلانتیدا ایسراییلین غزهده حیاتا کئچیردیگی سوی قیریم و اوردوه چایینین باتی ساحلینده تؤرتدیگی جینایتلرین دایاندیریلماسی اوچون آتیلا بیلهجک آددیملار موذاکیره ائدیلیب.
بیلدیریلیب کی، غزهده داوام ائدن آتیشکس موذاکیرهلری و غزهیه اینسانی یاردیم سعیلری دیرلندیریلیب، فیلیسطینین تانینماسی و ایکی دؤولتلی حل یولونا نایل اولماق اوچون گؤرولهجک تدبیرلر موذاکیره اولونوب. توپلانتی سونوندا قبول ائدیلن بیاناتدا، فیلیسطینین بیر آن اول تانینماسی و ایکی دؤولتلی حله دستک اوچون اولوسلار آراسی توپلوما چاغیریش ائدیلیب.
"توپلانتیدا آرتان اولوسلار آراسی حقوق پوزونتولارینا توخونولاراق، غزهده تئز بیر زاماندا آتیشکس اعلان اولونماسی و اوردون چایینین باتی ساحیلینده فیلیسطینلیلری هدف آلان هوجوملارا سون وئریلمهسینین واجیبلیگی وورغولانیب،" ایفادهسیندن ایستیفاده ائدیلیب.
بیاناتدا همچنین غزهیه "عاجیل و فاصیلهسیز اینسانی یاردیم" گؤندریلمهسینین واجیبلیگی و بیرلشمیش میللتلر تشکیلاتینین (بمت) اورتادوغوداکی فیلیسطینلی سیغینماچیلارا کؤمک و باییندیرلیق آژانسینین (اونروا) فعالیتلرینه دستک وئریلدیگی قئید اولونوب. آچیقلامادا سپتامبرین سونوندا کئچیریلهجک بمت ایجلاسینین یوکسک سویهلی هفتهسی چرچیوهسینده نیویورکدا یئنی بیر توپلانتینین کئچیریلهجگی قراری بیلدیریلیب.
ناظیر فیدان، ایشتیراک ائتدیگی توپلانتیلاردا فیلیسطین دؤولتینین بمت-یه "تام عضو" اولماسی و داها چوخ اؤلکه طرفیندن تانینماسی اوچون اورتاق تشببوسلرین آرتیریلماسینین لازیم اولدوغونو وورغولاییب. او، بو آددیملارا قارشی دوران اؤلکهلر اوزرینده تضییق گؤستریلمهسینین اهمیتینه توخونوب. فیدان همچنین، اولوسلار آراسی عدالت محکمهسینده ایسراییله قارشی آچیلان سوی قیریم داواسینا داها چوخ اؤلکهنین قوشولماسی اوچون چاغیریش ائدیب.
"تورکیه، فیلیسطینده عاجیل و دایمی آتیشکسین تامین اولونماسی، اینسانی یاردیملارین فاصیلهسیز اولاراق غزهیه چاتدیریلماسی، فیلیسطینین تانینماسی و ایکی دؤولتلی حل یولوندا لازیمی آددیملارین آتیلماسی ایستیقامتینده چالیشمالارینی داوام ائتدیرهجک،" دئیه آچیقلامادا بیلدیریلیب.
ایلگیلیلی خبرلر
تورکیهنین تئررورلا موباریزهسی قطعیتله داوام ائدیر
شیمالی عراقین گارا بؤلگهسینده 2 پ.ک.ک تئررورچوسو ضررسیزلشدیریلیب.
