تورکیه، نتانیاهونون میصره قارشی ادعالارینی «قبولائدیلمز» آدلاندیردی
تورکیه ایسرائیلین باش ناظیری بنیامین نتانیاهونون «فیلادئلفی کوریدوروندا ایسرائیل اوردوسونون مؤوجودلوغونو ساخلاماق اوچون» میصره قارشی ادعالارینی «قبولائدیلمز» آدلاندیریب
تورکیه ایسرائیلین باش ناظیری بنیامین نتانیاهونون «فیلادئلفی کوریدوروندا ایسرائیل اوردوسونون مؤوجودلوغونو ساخلاماق اوچون» میصره قارشی ادعالارینی «قبولائدیلمز» آدلاندیریب.
خاریجی ایشلر ناظیرلیگیندن وئریلن آچیقلامادا قید اولونوب کی، ایسرائیلین باش ناظیری نتانیاهو غزهده تؤرتدیگی جینایتلری اؤرت باس ائتمک و آتیشکس دانیشیقلارینین نتیجهلنمسینه مانع اولماق اوچون یالانلارینی داوام ائتدیریر.
آچیقلامادا، "فیلادئلفی کوریدوروندا ایسرائیلین حربی وارلیغینی داوام ائتدیرمک اوچون نتانیاهونون میصر عرب جمهوریتینه قارشی سون ادعالاری قبول ائدیلمزدیر" دئییلیب.
آچیقلامادا میصرین غزهده ساواشی بیتیرمک و میلیونلارلا فیلیسطینلییه یاردیم الی اوزاتماق اوچون واسیطهچیلیک چابالارینین دستهکلندیگی بیلدیریلیب.
سپتامبرین ۲-ده ایسرائیلین باش ناظیری نتانیاهو غزهده گئچیردیگی مطبوعات کنفرانسیندا، ساواشین مقصدلرینه نایل اولونماسینین فیلادئلفی کوریدوروندان گئچدیگینی بَیان ائدهرهک اؤلکهسینین اورادان چیخمایاجاغینی آچیقلامیشدی.
نتانیاهو، "غزه ایله میصر سرحدینده یئرلشن فیلادئلفی کوریدوروندان چیخان کیمی سیلاحلارین، دؤیوش ماتئریاللارینین، راکئت ایستئحصالی اوچون لازیم اولان آبادانلیقلارین و تونئل قازماق اوچون ماشینلارین کوتلوی شکیلده داخیل اولماسینا هئچ بیر مانع اولمایاجاق" دئمیشدی.
«فیلادئلفی کوریدوروندا هئچ بیر مانع اولمادیغی اوچون غزهنین ایسرائیل اوچون بؤیوک تهلوکهیه چئوریلدیغینی» ادیعا ائدن نتانیاهو غزهده ساواش ائحتیماللارینین ایرانین نظارتی، مالیهسی و رهبرلیگی آلتیندا باش وئردیگینی ادعا ائدیب.
میصر خاریجی ایشلر ناظیرلیگی ایسرائیل مسئوللارینین رسمیلرینین فیلادئلفی کوریدورو ایله باغلی بوتون ادعالارینی رد ائتدیکلرینی آچیقلاییب.
