تورکیه یونانیستانا یاردیم الی اوزاتدی
"یانغینلارلا مباریزه ائدن قونشوموز یونانیستانا دستک مقصدی ایله ایکی یانغین سؤندورمه اوچاغی و بیر هلکوپتر گؤندریلمهسی اوچون لازیم اولان ایشلر باشلادیلمیشدیر"
تورکیه، یانغینلا مباریزه ائدن یونانیستانا دستک مقصدی ایله ایکی یانغین سؤندورمه اوچاغی و بیر هلیکوپتر گؤندریر.
خاریجی ایشلر ناظیرلیگی سؤزچوسو اؤنجو کئچهلی، اکس سوسیال مئدیا حسابیندان ائتدیگی پایلاشیمدا، "آتنی تأثیری آلتینا آلان یانغینلارلا مباریزه ائدن قونشوموز یونانیستانا دستک مقصدی ایله ایکی یانغین سؤندورمه اوچاغی و بیر هلکوپتر گؤندریلمهسی اوچون لازیم اولان ایشلر باشلادیلمیشدیر" دئدی.
تورکیه، پایتاخت آتن یاخینلارینداکی وارناوادا باشلایان و شدتلی کولک سببی ایله آتتیکینین مختلیف بؤلگهلرینه یاییلان یانغین سببی ایله یونانیستانا کؤمک تکلیف ائتمیشدی.
دیپلوماتیک قایناقلارا گؤره، خاریجی ایشلر ناظیری حاکان فیدان، یاخشی قونشولوق علاقهلری چرچیوهسینده تورکیهنین یونانیستانا کؤمگه حاضر اولدوغو مئساژینی آتن رهبرلیگینه چاتدیرمیشدی.
یونان طرفی ایسه تکلیفی دگرلندیرهجکلرینی، لازیم اولماسی حالیندا تورکیهدن دستک ایستهیهجکلرینی ایفاده ائتمیشدی.
اؤته یاندان، وارناوادا بازار گونو باشلایان و شدتلی کولک سببی ایله وریلیسیایا دا سیچرایان یانغیندا، یانمیش بیر جسد اولدوغو بیلدیریلدی.
جسدین، یانغین اثناسیندا ایتن و اوندان خبر آلینابیلمهیهن تخمیناً ۶۵ یاشیندا بیر قادینا عاید اولدوغو ایفاده ائدیلدی.
