تورکیه و روسیا خاریجی ایشلر ناظیرلری آراسیندا گؤروش اولوب

تورکیه-ین خاریجی ایشلر ناظیری هاکان فیدان بریکسه عضو اؤلکه لرین خاریجی ایشلر ناظیرلری توپلانتی‌سی چرچیوه‌سینده روسیا خاریجی ایشلر ناظیری سرگئی لاوروو ایله گؤروشوب.

دیپلوماتیک منبع‌لردن الده ائدیلن معلوماتا گؤره، گؤروشده ایکی طرف‌لی و بولگه‌سل علاقه‌لر موذاکیره ائدیلیب، تورکیه اوچون اهمیت کسب ائدن اقتصادی مسئله‌لر گوندمه گتیریلیب.

طرفلر غزه-ده‌کی سون وضعیتی ده قیمتلندیریبلر.

روسیا خاریجی ایشلر ناظیرلیگیندن وئریلن یازی‌لی آچیقلامایا گؤره، اورتا دوغو و گونئی قافقازداکی وضعیت ده داخیل اولماقلا اولوسلار آراسی گوندمین اساس مسئله‌لرینه توخونولان گؤروشده سرگئی لاوروو روسیانین بریکس چرچیوسیندکی اونجه لیک لری باره‌ده هاکان فیدانی معلوماتلاندیریب.

ایکی طرف‌لی سیاسی دیالوگ، تیجارت و اقتصادی امکداشلیغا دایر جاری مسئله‌لرین موذاکیره اولوندوغو گؤروشده روسیا طرفی مؤوجود پروبلئم‌لرین حلی، علاقه‌لرین داها دا گئنیشلندیریلمه‌سی و فایدا‌لی قارشی‌لیق‌لی فعالیت ساحه‌لری‌نین تاپیلماسی اوچون امکداشلیغین داوام ائتدیریلمه‌سی‌نین واجیب‌لیگینی وورغولاییب.

قئید ائدک کی، هاکان فیدان نیژنی نووگورود شهرینده کوبانین خاریجی ایشلر ناظیری برونو رودریگز ایله ده گؤروشوب.

خاریجی ایشلر ناظیرلیگی‌نین رسمی "ایکس" اینترنت صحیفه سینده ائدیلن پای‌لاشیمدا بو ایفادلره یئر وئریلیب: "ناظیریمیز هاکان فیدان نیژنی نووگورود شهرینده تشکیل ائدیلن بریکس پلاس ایجلاسی چرچیوسینده کوبانین خاریجی ایشلر ناظیری برونو رودریگز ایله گؤروشوب".

دیپلوماتیک منبع‌لردن الده ائدیلن معلوماتا گؤره، گؤروش زامانی سیاسی و اقتصادی علاقه‌لر موذاکیره اولونوب.

کوبا-یا تطبیق ائدیلن تحریمین موذاکیره ائدیلدیگی گؤروشده غزه-ده‌کی سون وضعیت ده قیمتلندیریلیب.

هاکان فیدان کوبا-یا "فیلیسطین داواسی"نا وئردیگی دستکه‌یه گؤره تشککور ائدیب.