تورکیه‌نین جمهورباشقانی سئچیمی سونا چاتدی

تورک سیاسی تاریخین‌ده ایلک دفعه یاشانان جمهورباشقانی سئچیمی ایکینجی دؤور سس وئرمه‌سی اوچون سس وئرمه ایشلری، یئرلی ساعات ایله ۱۷.۰۰ اعتیبارییلا سونا چاتدی، صاندیقلار قاپاندی.
تورکیه‌نین، ۵ ایل بویونجا وظیفه یئرینه جمهورباشقانینین تعیین اولوناجاغی سئچیمده، ۱۴ می‌ده‌کی ایلک دؤورده ان چوخ اویو آلان جمهور اتفاقینین نامیزدی رجب طیب اردوغان ایله میللت اتفاقینین نامیزدی کمال قیلیچداراوغلو یاریشدی.
یورددیشی سئچیجی لیستینه ثبتلی تخمیناً ۳،۵ میلیون سئچیجی اوچون، ۷۳ اؤلکه ۱۵۱ نماینده‌لیک‌ده ۱۶۷ نقطه‌ده صاندیق قوروللاری یارادیلمیشدی.
یورددیشی نماینده‌لیکلرین‌ده‌کی سس وئرمه ایشلری ۲۴ می‌ده سونا چاتدی. یورددیشیندا وئریلن اویلار، اوچاقلار و دیپلوماتیک داشیییجیلارلا تورکیه‌یه گتیریلدی.
باشکند آنکارادا یورددیشی ائلچه سئچیم قورولون‌دا ساخلانان سسلر، بو گون بوتون یورددا سس وئرمه ایشینین تاماملانماسینین آردین‌دان دیگر اویلارلا ائش زامانلی آچیلاراق ساییلماغا باشلاندی.
اولدوغو اؤلکه‌ده تعیین اولونان مدت‌ده اوی وئره‌بیلمه‌یه‌نلرین گؤمروک قاپیلارین‌دا سس وئرمه ایشلری ایسه تورکیه‌ده اولدوغو کیمی ساعات ۱۷یه قدر سوردو.
اردوغان و قیلیچداراوغلو، ایلک دؤورو ۱۴ می‌ده ائدیله‌ن ۳ نامیزدلی جمهورباشقانی سئچیمینده ایلک ۲ سیرانی پایلاشمیش آنجاق قازانماق اوچون لازیم‌ اولان یوزده ۵۰ + ۱ حدینی گئچه‌بیلمه‌میشدیلر.