مادورو: اردوغانی چوخ سئویریک
"اردوغان بیزیم ان چتین ایللریمیزده، یاشادیغیمیز ان پیس شرطلرده همیشه ونزوئلانین یانیندا اولدو"
ونزوئلا جمهورباشقانی نیکولاس مادورو،
"بیز جمهورباشقانی رجب طیب اردوغانی اؤلکهمیزین بؤیوک بیر قارداشی کیمی گؤروروک. تورک خالقی بیلمهلیدیر کی، اردوغانی چوخ سئویریک چونکو او یاخشیلیق سئور و بؤیوک اۆرهکلیدیر" دئدی.
اؤلکهسینه سفر ائدن تیجارت باخانی محمد موش و تورکیه نماینده هیئتینی میرافلورئس ساراییندا قبول ائدن مادورو، خاریجی اقتصادی ایلیشکیلر قورولو ایله ونزوئلا اولوسلارآراسی یاتیریم مرکزی آراسیندا آنلاشما مموراندومو ایمضالاندیقدان سونرا آچیقلامالار وئردی.
نیکولاس مادورو،
"ونزوئلا ایله تورکیه آراسیندا اقتصادی ایلیشکیلرینی گلهجکده رفاه، زنگینلیک و قارشیلیقلی فایدا گؤزلهییر. ایندییه قدر بئله اولدو، بوندان سونرا دا بئله اولاجاق، ایرلی دوغرو گئدیریک" دگرلندیرمهسینی ائتدی.
تورک هاوا یوللارینین (تهی) ایکی اؤلکه آراسینداکی اؤنمینی وورغولایان مادورو، "تورکیهنین بؤیومهسینی هر زامان سئوینجله قارشیلاییریق. ایندیدن هفتهده ۷ اوچوشوموز وار و بو، آرتاراق داوام ائدجک، چونکو تورکیه تکجه کاراکاسی بیرلشدیرمیر عینی زاماندا ایستانبول، گونئی آمریکا و بوتون بؤلگهلری بیرلشدیریر" دئدی.
مادورو ایکی اؤلکه آراسینداکی دوستلوغو خاطیرلاداراق بونلاری سؤیلهدی:
"جمهورباشقانی اردوغانی اؤلکهمیزین بؤیوک قارداشی کیمی گؤروروک، تورک خالقی بیلمهلیدیر کی، اردوغانی چوخ سئویریک چونکو او یاخشیلیق سئور و بؤیوک اۆرهکلیدیر. اردوغان بیزیم ان چتین ایللریمیزده، یاشادیغیمیز ان پیس شرطلرده همیشه ونزوئلانین یانیندا اولدو. اؤلکهمیزه سئوگی و شفقت اللرینی اوزاتدی. تورک خالقینا و اردوغانا سلام اولسون".