چاناق‌قالا گئچیلمز!
بو دفعه تاریخ صحنه‌سینه ۴ ایل سونرا مستقیللیک مباریزه‌سینی باشلاداجاق مصطفی کمال پاشا چیخدی
تورک میللتی اوچون یئنیدن یارانما حماسه‌سیدیر ۱۸ مارس چاناق‌قالا ظفری.
دوشمنین بؤیوک زره‌لیلری بیر گون ایچینده یوخ ائدیلدی.
دنیز ساواشینین قازانیلدیغی او گون "چاناق‌قالا گئچیلمز" شعاری، گئلی‌بولو یاریم آداسیندان بوتون دونیانین یادداشینا یازیلدی.
تورک عسگری ۱۸ مارس ۱۹۱۵.جی ایلده آدینی تاریخه بیر داها ظفرله یازدیردی.
«دلینمز» دئییله‌ن زره‌لیلر پارچالاندی، «باتماز» دئییله‌ن گمیلر تک تک چاناق‌قالا بوغازینا باتیریلدی.
چاناق‌قالایا ایلک دوشمن سالدیریسی بیرینجی دونیا ساواشینین ایلک گونلرینده اولدو، ۳ نوامبر ۱۹۱۴.جو ایلده. اینگیلتره قوشاتما دونانماسی بوغازین گیریشینده‌کی سدالبحر قالاسینی بومبالادی، ۵ عثمانلی ظابطی و ۸۱ عسگر سدالبحر قالاسینداکی مهماتلیغین پاتلاماسی نتیجه‌سینده شهید اولدو. چاناق‌قالا ساواشینین بو ایلک شهیدلری سدالبحر قالاسینین گیریش قاپیسینین یانینا دفن ائدیلدی. ایلک شهیدلر آنیدی دا بورادا اوجالدیلدی.
باشدا اینگیلیسلر اولماقلا اتفاق دؤولتلرینین هدفینده ایستانبولون ایشغالی وار ایدی.
عثمانلی اوردوسو چاناق‌قالا بوغازینداکی ساوونما‌نی گوجلندیردی.
ساحللره گمیلردن سؤکوله‌ن توپلار یئرلشدیریلدی، بوغازین هر ایکی یاخاسیندا مین خطلری بوغازا سیرالاندی.
اتفاق دؤولتلری چاناق‌قالا بوغازینا ۱۹ فوریه‌ده و آردیندان ۶ گون سونرا ایکی دفعه دنیز عملیاتی ایله یورودو و هر ایکی‌سینده ده نتیجه‌سی اولمادی. بوندان سونرا دونانمانین باشینا آدمیرال دو روبک گتیریلدی. اونلار ۱۸ مارس سحری بؤیوک دنیز عملیاتینا باشلادیلار.
«نصرت» مین گمیسی آرتیق چو‌دان حاضر ایدی. ۷ مارسی ۸ مارسا باغلایان گئجه «نصرت»ین دؤشه‌دیگی مینلر ۱۸ مارس گونو دوشمنلره اؤلدوروجو ضربه‌لر ووردو. اتفاق دؤولتلرینین ساواش گمیلری توپ آتیشیندان قاچارکه‌ن مینلره ایلیشدی. فرانسانین زره‌لی گمیسی «بوووئت» او مینلردن بیرینه چارپاراق ۳ دقیقه ایچینده ۶۰۳ ساواشچیسی ایله بیرلیکده سولارا گؤمولدو.
اینگیلتره‌نین «اوکئان» و «ایررسیستیبل» گمیلری ده عینی سونو یاشادی. «آگاممنون»، «اینفلکسیبل»، «سوفرن» و «گالوا» گمیلری ایسه جدی خسارت‌لر آلاراق ساواش گوجونو ایتیردیلر. بوتون بونلاردان سونرا آدمیرال دو روبک دونانمایا گئری چکیلمه امری وئردی. بئله‌لیکله، ۱۸ مارس ۱۹۱۵.جی ایلده تورک عسگرلری چاناق‌قالا حماسه‌سین‌ده‌کی ایلک بؤیوک ظفری قازاندیلار.
آغیر یارالار آلان اتفاق دؤولتلری ۱ آی سونرا - ۲۵ آوریل‌دا قورو ساواشینا باشلادیلار و یئنه عینی مغلوبیتله قارشیلاشدیلار. بو دفعه تاریخ صحنه‌سینه ۴ ایل سونرا مستقیللیک مباریزه‌سینی باشلاداجاق مصطفی کمال پاشا چیخدی. او زامان گئلی‌بولودا شهید قانلارییلا داها بیر دستان یازیلدی: «چاناق‌قالا گئچیلمز" سؤزلری او دستانلا یادداشلارا حک اولدو.
