اردوغان: قیریمین ایشغالینا سسسیز قالانلار ایندی بیر شئیلر سؤیله‌ییرلر

"اوکراینانین اگمنلیگینی هئچه سایان غیر مشروع آددیملاری معذور گؤرمه‌ریک"

1794038
اردوغان: قیریمین ایشغالینا سسسیز قالانلار ایندی بیر شئیلر سؤیله‌ییرلر

جمهورباشقانی رجب طیب اردوغان،

"اوکراینانین اگمنلیگینی هئچه سایان غیر مشروع آددیملاری معذور گؤرمه‌ریک" دئدی.

اردوغان، آنتالیا دیپلوماسی فوروموندا دانیشدی.

تورکیه‌نین هم آغ دنیز هم ده قاراده‌نیز اؤلکه‌سی اولدوغونو سؤیله‌یه‌ن جمهورباشقانی،

"اوکراینا و روسیا قاراد‌نیزدن قونشوموز و دوستوموزدور. قونشولاریمیز آراسینداکی بحرانین ایستی چاتیشمایا چئوریلمه‌سیندن بؤیوک کدر دویدوق. گرگینلیگین آرتاراق بو مرحله‌یه گلمه‌سی ان چوخ بیزی راحاتسیز ائتدی، ان چوخ بیزی قایغیلاندیردی. قونشوموز اولان بیر اؤلکه‌نین اگمنلیگینه قارشی سالدیرقان حرکتلری اصلا معذور گؤرمه‌ریک" دئیه دانیشدی.

قیریمین یاسادیشی الحاقی باشدا اولماق اوزره اوکراینانین تورپاق بوتونلوگونو هئچه سایان غیر قانونی آددیملاری تورکیه اولاراق رد ائتدیکلرینی ایفاده ائد‌ن اردوغان،

"قیریملا باغلی آچیق توتوموموزو ۲۰۱۴.جو ایلده‌ن بو یانا هر وسیله ایله ایفاده ائتدیم، ایفاده ائتدیک، هر یئر‌ده آچیقجا دیله گتیردیک" ایفاده‌سینی ایشلتدی.

جمهورباشقانی بئله دانیشدی:

"ایستر روسیا فدراسیونویلا ایستر اوکراینالی دوستلاریمیزلا ائتدیگیمیز بوتون گؤروشمه‌لرده بو مسئله‌نی گوندمده توتدوق. اگر ۲۰۱۴ده قیریمین ایشغالینا بوتون باتی، بوتون دونیا سس چیخارمیش اولسا ایدی بو گونکو تابلو ایله قارشی قارشییا قالاردیق ‌می؟

اما قیریمین ایشغالینا سسسیز قالانلار ایندی بیر شئیلر سؤیله‌ییرلر. یاخشی، عدالت بو یئر کوره‌سینین بللی بیر بؤلومونده گئچرلی، دیگر بؤلوملرینده ایسه گئچرسیز می؟ بو نئجه بیر دونیا؟

 چوخ تأسف کی بو حاقسیزلیغین آرادان قالدیریلماسی باره‌سینده اولوسلارآراسی توپلوم لازیم اولان حساسیتی گؤسترمه‌دی، لازیم اولان دستگی وئرمه‌دی. اوکراینا حاقلی دعویسینده تک بوراخیلدی. بو گون واختیندا گوجلو ایراده سرگیله‌نمه‌سی حالیندا دیپلوماسی ایله حل ائدیله‌بیله‌جک پروبلئملرین داغیدیجی و جان یاندیریجی نتیجه‌لری ایله اوزله‌شیریک. ائولرینی ترک ائد‌ن وطنداشلاری، قورخو و قایغی دولو اوشاقلاری، داغیلان شهرلری، اؤلن گناه‌سیزلاری گؤردوکجه کدریمیز آرتیر".

رجب طیب اردوغان، دانیشماسیندا آیریجا، دونیاداکی استقرارسیزلیق و چاتیشمالار سببی ایله میلیونلارجا اینسانین ائولرینی، ترک ائتمک مجبوریتینده قالدیغینا توخوناراق،

"آجلیق ویروسو هر ایل دونیادا یئنی نسیل کوروناویروسدان داها چوخ اینسانین حیاتینا سون وئریر. بو گون یئر اوزونده هر ۱۰ ثانیه‌ده بیر اوشاق یالنیز بیر تیکه چؤرک، بیر قورتوم سو تاپابیلمدیگی اوچون اؤلور. استقرار‌سیزلیق و چاتیشمالار سببی ایله میلیونلارجا اینسان ائولرینی، یوردلارینی ترک ائتمک مجبوریتینده قالیر" دئدی. 



ایلگیلی‌لی خبرلر