تورکییه‌دن اساسسیز ادعالارا تپکی
"سوریه‌نین بؤلونمه‌سینی هدفله‌یه‌ن پلانلارینین پوزولماسین‌دان قایناقلانان بیر تپکینین تظاهرودور"
تورکییه، گونئی سرحدین‌ده یارادیلماغا چالیشیلان ترور دهلیزینی یوخ ائتمک، بؤلگه‌یه باریش و دینجلیک گتیرمک آماجی ایله سوریه‌نین قوزئیینده ترور هؤرگوتلرینه قارشی باشلاتدیغی باریش بولاغی عملیاتینین دموگرافیک قورولوشو دییشدیرمه‌گی هدفله‌مه‌‌دیگینی بیلدیردی.
خاریجی ایشلر باخانلیغیندان وئریله‌ن یازی‌لی آچیقلامادا، عملیاتین، آوروپا بیرلیگی و ناتو طرفیندن ترور هؤرگوتو قبول ائدیله‌ن پ‌کاکانین سوریه قولو پید/یپگ عنصورلرینی هدف آلدیغی وورغولاندی.
اؤز وطنداشی خاریجی تروریست ساواشچیلاری گئری آلمایان اؤلکه‌لرین داعشله مباریزه‌ده تورکییه‌یه درس وئرمه حاقینین اولمادیغی قید ائدیله‌ن آچیقلامادا،
"تورکییه‌نین عملیات ساحه‌سینین دموگرافی‌سینی دییشدیرمک کیمی بیر نیتی یوخدور. پید/یپگ ترور هؤرگوتونون آیریلیقچی گوندمینه دولاییلی و یا آچیق دستک وئره‌ن اؤلکه و چئوره‌لرین بو دورومدا تورکییه‌یه قارشی اساسسیز اتهاملاری، سوریه‌نین بؤلونمه‌سینی هدفله‌یه‌ن پلانلارینین پوزولماسین‌دان قایناقلانان بیر تپکینین تظاهرودور. باریش بولاغی عملیاتینین سوریه‌ده سیاسی چؤزوم چابالارینا ضرر وئرجگی ادعاسی گرچکلیکدن اوزاقدیر" ایفاده‌لرینه یئر وئریلدی.
خاریجی ایشلر باخانلیغی، بیرلشمیش میللتلر یئتکی‌لی‌سینین سوریه‌ده یارادیلاجاق گوونلی بؤلگه ایله سربرنیتسا سوی‌قیریمی آراسین‌دا ایلیشکی قوران ایفاده‌لرینی ده شدتله قینادی.
باخانلیق سؤزچوسو حامی آکسوی قونو ایله باغلی وئردیگی آچیقلامادا،
"سربرنیتسا سوی‌قیریمینین اؤنلنمه‌سی اوچون ان گوجلو چابانی اؤلکه‌میز صرف ائتمیش اولوب، بونون عینی جغرافیادان گلن بیر بیرلشمیش میللتلر گؤره‌ولی‌سی طرفیندن چوخ یاخشی بیلیندیگی آشکاردیر. بونا گؤره ده، تورک توپلومو اوچون بؤیوک حساسیت عرض ائد‌ن سربرنیتسا سوی‌قیریمینین یانلیش بیر دوشونجه ایله بو شکیل‌ده سوءاستعمالی اصلا قبول ائدیلمز" ایفاده‌لرینی ایشلتدی.
