"یئنی زلاند تروریستی و داعشین جنسی عینیدیر"
اردوغان، آمریکا بیرلشمیش دؤولتلریندا یاییملانان واشینگتن پست قازئتهسی اوچون بیر مقاله یازدی
جمهورباشقانی رجب طیب اردوغان، یئنی زلانددا ۵۰ مسلمانی قتله یئتیرهن تروریستین، سؤزده مانیفستینده تورکیهیه و اؤزونه بیر نئچه دفعه اشاره ائتمهسینین آنلاملی اولدوغونو بیلدیردی.
اردوغان، آمریکا بیرلشمیش دؤولتلریندا یاییملانان واشینگتن پست قازئتهسی اوچون "یئنی زلاند تروریستی و داعشین جنسی عینیدیر" باشلیقلی بیر مقاله یازدی.
یئنی زلاندین کرایستچورچ شهرینده باش وئرهن ترور سالدیریلاریندا ۵۰ سوچسوز اینسانین شهید اولدوغونو قید ائدن اردوغان، جمعه نامازی اوچون یئرلی مسجیدلرده توپلانان چوخ ساییدا مسلمانین سالدیریدان یارالی اولاراق قورتولدوغونو خاطیرلاتدی.
جینایت سلاحلارینین اوزرینده و تروریستین اینترنت اورتامیندا وئردیگی سؤزده مانیفستده چوخ ساییدا تاریخی عطفه راست گلدیینه دقت چکهن اردوغان،
"تروریستین تورکیهیه و منه بیر نئچه دفعه عطف ائتمهسی هم معنالی، هم ده اوزرینده دوشونولمهسی لازیم اولان بیر خصوصدور" ایفادهلرینی ایشلتدی. اردوغان، قتلعام سوروملوسونون دونیا تاریخینی و خریستیان اینانجینی تحریف ائدرک، منحرف فیکیرلرینی مشروعلاشدیرماغا چالیشدیغینی وورغولایاراق،
"اینسانلارین آراسینا نیفرت توخوملاری سپمهیه جهد ائتمیشدیر. گئچمیشده دفعهلرله ترورون دینی، دیلی و یا عیرقی اولمایاجاغینی ایفاده ائتمیش بیر لیدئر اولاراق اؤتن هفته باش وئرهن ترور سالدیریلارینی خریستیان اؤیرتیسینه، اخلاقینا و یا پرینسیپلرینه باغلاماغا یؤنهلهن هر جور چابانی قطعی اولاراق رد ائدیرهم. یئنی زلانددا باش وئرهنلر آنجاق جهالت و نیفرتین زهرلی بیر چیخیشی اولاراق دیرلهندیریلهبیلر" گؤروشونو پایلاشدی.
پرزیدنت اردوغان، مقالهسینی بئله داوام ائتدیردی:
"میللتیمیز، تاریخین تروریستلر طرفیندن تحریف ائدیلمهسیله ایلک دفعه بو حادثهده قارشیلاشمامیشدیر. تاریخی رادیکال ایدئولوژیسینین پرسپکتیویندن یوروملایان و اکثریتی مسلمان مینلرجه وطنداشین قاتلی اولان اعش ترور هؤؤگوتو، سون ایللرده ایستانبولون یئنیدن فتحی اوچون چاغریلار ائتمیشدیر. بو چاغری، کرایستچورچ سالدیرقانینین مانیفستینده یئر آلان شهری بیر داها خریستیان ائتمک سؤزو ایله بنزرلیک گؤستریر. داعش، عینی شکیلده تورکیه جمهوریتینی اورتادان قالدیرماغا آند ایچمیشدیر کی تورک عسگرینین سوریهده ترور هؤرگوتونه بو قدر آغیر بیر ضربه وورماسینین سببلریندن بیری بودور.
بو اعتبارلا، یئنی زلانددا، سوچسوز اینسانلارین جانینی آلان قاتلله تورکیه، فرانسا، اندونزی و باشقا یئرلرده ترور سالدیریلاری تشکیل ائدنلر آراسیندا کسینلیکله هئچ بیر فرق اولمادیغینی معین ائتمک دورومونداییق".
کرایستچورچ قتلعامی سونراسی باتینین اوزرینه دوشن بعضی مسئولیتلر اولدوغونو قید ائدن اردوغان، باتیلی توپلوملارین و حکومتلرین، عیرقچیلیق، خارجی دوشمنلیگی و ایسلاموفوبیی کیمی سون ایللرده یوکسهلهن ایدئولوژیلرین نورماللاشماسینا ایجازه وئرمهمهسی چاغریسی ائتدی:
"باتیلی لیدئرلرین، یئنی زلاند باشباخانی سایین جاسینا آردرنین جسارتی، لیدئرلیگی و صمیمیتیندن درس آلاراق اؤز اؤلکهلرینده یاشایان مسلمانلاری قوجاقلاماسی لازیمدیر".