تورکیهنین تهران ائلچیسی گووهن مکتوبونو سوندو
اؤرس، "جانلا باشلا چالیشاجاغینی" ایفاده ائتدی
تورکیهنین تهران ائلچیسی پروفسور دکتر دریا اؤرس، ایران پرزیدنتی حسن روحانییه گووهن مکتوبونو سوندو.
اؤرسو دفترینده قبول ائدن روحانی، بورادا دانیشماداسیندا، تورکیه ایله ایرانین قارداشلیق و دوستلوغا دایانان تاریخی بیر گئچمیشه صاحب اولدوقلارینی و ایکی اؤلکهنین ده بؤلگه و دونیا مسئلهلرینه دایر سیاسی گؤروشلرینین بیر بیرینه بنزدیگینی ایفاده ائدرک، "ایران ایله تورکیه بؤلگهده گوجلو ایکی اؤنملی اؤلکه و تروریزمه قارشی ایش بیرلیگی ایچینده" ایفادهلرینی ایشلتدی.
پرزیدنت رجب طیب اردوغانین داواملی اولاراق ایکی اؤلکه آراسینداکی تیجارت حجمینین ۳۰ میلیارد دلارا چیخاریلماسی لازیم اولدوغونا وورغو ائتدیگینی خاطیرلاداراق، اؤرسون ائلچیلیگی دؤورونده بو هدفه چاتمالاری لازیم اولدوغونو سؤیلهدی.
ائلچی اؤرس ده پرزیدنت اردوغانین سلاملارینی چاتدیراراق ایران اینقیلابینین ۴۰.جی ایل دؤنومو سببی ایله روحانییه تبریکلرینی سوندو.
تورکیه-ایران ایلیشکیلرینین باشدا سیاسی، اقتصادی و مدنی اولماق اوزره هر ساحهده گلیشمهسی و ایرلیلهمهسی اوچون الیندن گلن چابانی گؤسترهجگینی وورغولایان اؤرس، بؤلگهنین ایکی گوجلو و قدیم اؤلکهسینین ایش بیرلیگینی آرتیرماق اوچون "جانلا باشلا چالیشاجاغینی" ایفاده ائتدی.
اؤرس، اوزون ایللر سونرا خیاللارینده اولان بئله بیر وظیفهیه گتیریلمیش اولماقدان بؤیوک هیجان و قورور دویدوغونو دیله گتیردی.