جمهور باشقانی اردوغان اوزبکیستاندا

جمهور باشقانی رجب طیب اردوغان پاکیستاندا کئچیردیگی گؤروش‌لرینی باشا چات‌دیرا‌راق دونن آخشام ساعت‌لاریندا اؤزبکیستانا گئتدی.

اردوغان سمرقندده ایلک اولا‌راق اؤزبکیستانین بیرینجی پرزیدنتی ایسلام کریمووون قبرینی زیارت ائتدی.

اردوغان اؤزبکیستان جمهور باشقانی وکیلی و باش ناظیر شوکت میرزیایئو ایله گؤروشه‌جک. داها سونرا هئیت‌لر آراسیندا ایش یئمه‌گی تشکیل ائدیله‌جک.

امام بخاری و امام ماتوریدی‌نین مقبره‌لرینی ده زیارت ائده جک اولان اردوغان سمرقندده سون اولا‌راق تاریخی رگیستان مئیدانیندا اولا‌جاق.

تورکیه پرزیدنتی باش ناظیر معاوینلری وئیسی کایناک، توغرول تورکش، خاریجی ایشلر ناظیری مولود چاووش اوغلو، انرژی و طبیعی قایناق‌لار ناظیری برات آلبایراک، ایقتیصادیات ناظیری نیهات زیبکجی و عائله و سوسیال سیاست‌لر ناظیری فاطما بتول سایان کایا همرالیک ائدیر.

جمهورباشقانی اردوغان پاکیستان‌دان آیریلما‌دان اول بو اؤلکه‌نین باش ناظیری نواز شریف طرفین‌دن شرفینه وئریلن شام یئمگینده ایشتیراک ائتدی.

رجب طیب اردوغان یئمک‌دن سونرا اؤزونون تویتر صحیفه‌سینده پاکیستانا سفری حاقیندا یازدی:

پاکیستانا حیاتا کئچیردیگیم رسمی سفر ایکی اؤلکه آراسین‌داکی گوج‌لو قارداش‌لیق علاقه‌لرینی داها دا گوجلندیردی. دوست و قارداش پاکیستان خالقی‌نین و دؤولتی‌نین سفریمیز زامانی گؤستردیگی قوناق‌پرورلیک بیزی چوخ خوشبخت ائتدی. بونا گؤره پاکیستان پرزیدنتی جناب ممنون حسین و باش ناظیر حؤرمت‌لی نواز شریفه تشککور ائدیرم. لاهورا سفریمده ده بیزه گؤستریلن یاخین علاقه‌یه گؤره پنجاب ایالتی‌نین باش ناظیری شاهباز شریفه میننتدارلیغیمیز ایفاده ائدیرم.

جمهور باشقانی اردوغان ایکی اؤلکه آراسین‌داکی علاقه‌لرین گله‌جک دؤورده داها دا گوجله‌نه‌جگینه ه اینادیغینی دیله گتیره‌رک، پاکیستان خالقینا سلام و سئوگی‌لرینی چاتدیردی.