اردوغان ایقلیم کونفرانسینا قاتیلماق اوچون پاریس‌ده

ایجلاسدا بیر دانیشما ائده‌جک اولان پرزیدنت اردوغان، چوخ سایدا لیدرله ایکیطرف‌لی گؤروشمه‌لر ده ائده‌جک

357077
اردوغان ایقلیم کونفرانسینا قاتیلماق اوچون پاریس‌ده

پرزیدنت رجب طیب اردوغان بیرلشمیش میللت‌لر تشکیلاتی‌نین 21-جی ایقلیم کونفرانسینا قاتیلماق اوچون فرانسانین باشکندی پاریس‌ده.
اردوغان صاباح ساعات‌لاریندا گئتدیگی پاریس‌ده ایلک اولا‌راق فرانسا پرزیدنتی فرانسوا اوللاند لیدرلر شرفینه وئره‌جگی ضیافته قاتیلا‌جاق.
ایجلاسدا بیر دانیشما ائده‌جک اولان تورکیه پرزیدنتی اردوغان، چوخ سایدا لیدرله ایکیطرف‌لی گؤروشمه‌لر ده ائده‌جک.
فرانسا پرزیدنتی فرانسوا اوللاند و آلمانیا باش ناظیری آنگلا مرکل‌ین آرا‌لاریندا اولدوغو لیدرلرله بو گون بیر آرایا گله‌جک اولان اردوغان صاباح دا آمریکا بیرلشیک دولتلری پرزیدنتی باراک اوباما ایله گؤروشه‌جک.
پرزیدنت، روسیا دولت باشقانی ولادیمیر پوتین‌ه ایسه گؤروشمه تکلیف ائدیلدیگینی، اؤزون‌دن هله جواب گؤزلدیگینی سؤیله‌دی.
ولادیمیر پوتین‌ین سؤزچوسو دمیتری پسکوو ایسه؛
"پوتین، فرانسادا کئچیریله‌جک بیرلشمیش میللت‌لر تشکیلاتی‌نین ایقلیم کونفرانسیندا تورک همکاری رجب طیب اردوغان ایله گؤروشمه‌یه‌جک" آچیقلاماسی ائتدی.
آنادولو آژانسی‌نین خبرینه گؤره، روسیا دولت صدری‌نین تورک طرفی ایله هر هانسی بیر تماسی‌نین، خصوصیله تلفون گؤروشمه‌سی‌نین اولوب اولمایاجاغی شکلین‌دکی بیر سوا‌لی، پسکوو؛
"پروقرامیمیزدا هر هانسی بیر گؤروشمه یوخدور" شکلینده جوابلادی.
ایقلیم کونفرانسینا قاتیلان 147 اؤلکه‌نین دولت و حکومت باشقانلاری، 2020-جی ایلدن اعتباراً بوتون دونیادا اعتبارلی اولا‌جاق چرچیوه آنلاشماسی اوزرینده راضیلیغا چالیشا‌جاق.


اتیکتلر:

ایلگیلی‌لی خبرلر