هاکان فیدان لفکوشادا ارسین تاتار ایله بیرگه مطبوعات کونفرانسیندا چیخیش ائدیب
پرزیدنت ارسین تاتار، تورکیهنین هر پلتفرمدا قوزئی قیبریس تورک جمهوریتینه وئردیگی دستکی یوکسک قیمتلندیریب.
قوزئی قیبریس تورک جمهوریتینین پرزیدنتی ارسین تاتار: "آنا وطنیمیزه، تورکیهیه میننتداریق" دئدی.
پرزیدنت ارسین تاتار تورکیهنین خاریجی ایشلر ناظیری هاکان فیدان ایله لفکوشادا کئچیریلن گؤروشدن سونرا تشکیل اولونان بیرگه مطبوعات کونفرانسیندا چیخیش ائدیب. تورکیهنین دئمک اولار کی، هر پلتفرمادا قوزئی قیبریس تورک جمهوریتینه وئردیگی دستکه دقت چکن پرزیدنت بیلدیریب: "عدالتسیز قلوبال موحیطده قیبریس تورک خالقینین اؤز طبیعی حاقلارینین تامین ائدیلمهسی، سووئرئن و برابر اولوسلار آراسی ایستاتوسونون تصدیقی اوچون بؤیوک موباریزه آپاریریق. بو شرفلی یولوموزدا بیزی هر پلتفرمدا دستکلهین، یانیمیزدا دوران، دؤولتیمیزی ایرهلییه آپارماق و لاییق اولدوغو ایستاتوسا قوووشدورماق اوچون بوتون ایمکانلارینی سفربر ائدن آنا وطنیمیزه میننتداریق."
خاریجی ایشلر ناظیری هاکان فیدان ایسه "قیبریسدا ایکی دؤولتلی حل یولو خاریجینده باشقا بیر حل یولو یوخدور" دئیه بیلدیریب. او، قئید ائدیب: "قیبریس تورکلرینین 50 ایلدیر کی، معروض قالدیغی ایزولاسیون، سسسیز بیر اینسانلیق جینایتینه چئوریلمیشدیر. بونو بیلهرک و یا بیلمهیهرک حیاتا کئچیریرلر. قیبریس خالقینین بو وضعیتدن ان آز تاثیرلنمهسی اوچون الیمیزدن گلنی ائدیریک. سون 50 ایلده آدادا بیر رئاللیق یارانیب. ایکی دؤولتلی حل یولو خاریجینده آداداکی مؤوجودلوغون تصدیق اولونماسی اوچون باشقا بیر حل یولو اولمادیغینی هر کس گؤرور."
فیدان اساس چاغیریشینی گونئی قیبریس وطنداشلارینا و سیاسی لیدئرلرینه عنوانلاماق ایستهدیگینی وورغولاییب: "اونلار دا قیبریس آداسینی داها معاصر، اینکیشاف ائتمیش، باریس سئور و تهلوکهسیز بیر شکیلده ایرهلی آپارماق ایستییرلرسه، بو جور حل یوللارینی حیاتا کئچیرمکده جسارتلی داورانمالاری لازیمدیر. من بورادان اونلاری جسارتلی اولماغا دعوت ائدیرم."
ناظیر قوزئی قیبریس ایله هر ساحهده امکداشلیغی آرتیرماغا داوام ائدهجکلرینی بیلدیرهرک یونانیستان ایله تورکیه آراسیندا یارانان مثبت سیاسی آتمسفرین آدادا دا عکس-صدا دوغورماسینی ایستهدیکلرینی قئید ائدیب. هاکان فیدان علاوه ائدیب: "یونانیستان، تورکیه، قوزئی قیبریس تورک جمهوریتی و گونئی قیبریسین بیرلیکده بؤلگهمیزده داها یاخشی بیر گلهجک اینشا ائتمهسی مومکوندور."
ایلگیلیلی خبرلر
هاکان فیدان قیبریسدا گؤروشلر کئچیرمهیه داوام ائدیر
قوزیی قیبریس تورک جمهوریتینده سفرده اولان هاکان فیدان گؤروشلر کئچیرمهیه داوام ائدیر.
