سومرولوژی عالیمی «معزز علمیه چیغ» ۱۱۰ یاشیندا وفات ائتدی
تۆرکیه‌نین مدنیت و توریزم ناظیری، سومرولوژی عالیمی «معزز علمیه چیغ»ین وفات ائتمه‌سی ایله علاقه‌دار باش ساغلیغی وئریب.
سومرولوژی عالیمی «معزز علمیه چیغ» ۱۱۰ یاشیندا وفات ائتدی.
تۆرکیه‌نین مدنیت و توریزم ناظیری محمد نوری ارسوی، سومرولوژی عالیمی «معزز علمیه چیغ»ین ۱۱۰ یاشیندا وفات ائتمه‌سی ایله علاقه‌دار باش ساغلیغی وئریب.
ارسوی وئریدگی باش ساغلیغی مئساژیندا معزز علیمه چیغ‌ین "ان قدیم اینسان مدنیت‌لریندن بیری حاقیندا آیدینلاتما" مقصدیله علمی فعالیتینه و دیرلی ایشلرینه استیناد ائده‌رک، بو گؤرکملی عالیمه رحمت دیله‌ییب.
قید ائدک کی، معزز علیمه چیغ (Muazzez İlmiye Çığ) تانینمیش تۆرک سومرولوژی عالیمی اؤتن بازار گۆنو تۆرکیه‌نین جنوبونداکی مرسین شهرینده خسته‌خانادا ۱۱۰ یاشیندا دۆنیاسینی دَییشیب.
بو قادین سومرولوژی عالیمی ۱۹۱۴-جۆ ایلده بورسادا آنادان اولوب و قدیم دیللر ساحه‌سینده تحصیلینی باشا وئردیقدان سونرا آلمان-آمئریکالی هیتی‌اولوق هانس گوستاو گوتربوک و آلمان آشوراولوق بنو لندزبرگرین طلبه‌سی اولوب.
چیغ روس-آمئریکالی آشوراولوق ساموئل نوآ کریمر ایله امکداشلیق ائده‌رک اونلارجا سومر یازیسینی و لؤحه‌سینی دئشیفره ائتمه‌یه‌‌ده نایل اولوب.
معزز علیمه چیغ، دیل و سؤزلرین اوخشارلیغی و بیر-بیرینه باغلی قراماتیکا اساسیندا سومر دیلینین تۆرک دیللری ایله عینی عائله اولماسی نظریه‌سینی ایره‌لی سۆرن ایلک تاریخچی و دیلچی عالیملردن بیری اولوب و «سومرلر تۆرک‌لرین بیر قولودورلار» کیتابینین مۆلیفیدیر.
بو گؤرکملی سومرولوژی عالیمی‌نین"سومر لودینگیرای تاریخی" و "داش یازیلارین درینلیکلرینده" کیتابلاری فارس دیلینه ترجۆمه اولونوب.
