قاقاووز تورکلری
تورک طایفالاری اؤز آتا-بابا یوردلارین‌دان شرقی آوروپایا کؤچ ائدرکن ایکی اساس یول توتموشلار. اونلاردان بیری ایندیکی روسیه‌نین گونئییندن، ایکینجیسی ایسه ایران‌دان گئچیر
آراشدیرماجیلار قاقاوزلارین تورک توپلومو اولماسی ایله همفیکیردیرلر، لاکین اونلارین هانسی تورک توپلوملارینا منسوب اولدوقلارینا دایر ماهیتجه ایکی فرقلی باخیشی وار. بونلاردان بیری ده قاقاوز تورکلرینین پولی‌ائتنیک و یا چوخ‌میللتلی اولماسیدیر؛ دیگری مونوائتنیک و یا مونوتائتنیکلیگی مودافیعه ائدن تئزلردیر. پولی‌ائتنیک باخیشا گؤره قاقاوز تورکلری پئچئنئقلر، اوغوزلار و قومانلاردان عیبارتدیر؛ موانئتنیک باخیشا گؤره، قاقاوز تورکلرینین کؤکلری سلجوقلارا و یا کؤهنه بولقارلارا گئدیب چیخیر. قاقاوزلارین فورمالاشماسی ایله باغلی پولی‌ائتنیک باخیشی مودافیعه ائدنلر چوخ واخت اونلارین اینانج سیستئمینه دقت چکمه‌یه چالیشسالار دا، بو گون یاشادیقلاری بؤلگه‌یه تورکوستان جغرافیاسیندان، روس چؤللرینی گئچه‌رک گلمیش اولابیله‌جکلرینی ده بیلدیریرلر. بونا گؤره‌ده اونلار خریستیان دینینین تأثیری آلتیندا ایدیلر. مونوائتنیک گؤروشو دسته‌کله‌ینلر دانیشدیقلاری دیلده اوغوز تورکجه‌سی‌نین ائلئمئنتلرینی ائحتیوا ائتدیگی اوچون اونلارین ایران‌دان گلمیش اولابیله‌جه‌یینی ادیعا ائدیرلر. معلوم اولدوغو کیمی، تورک طایفالاری اؤز آتا-بابا یوردلارین‌دان شرقی آوروپایا کؤچ ائدرکن ایکی اساس یول توتموشلار. اونلاردان بیری ایندیکی روسیه‌نین گونئییندن، ایکینجیسی ایسه ایران‌دان گئچیر.
عوثمانلی دؤورونده قوزئی-دوغو بولقاریستاندا قاقاوزلار یاشاییردیلار. لاکین ۱۷۳۴ - ۱۷۳۹ و ۱۷۶۸ - ۱۷۷۴ عوثمانلی-روسیه ساواشلاریندان سونرا عوثمانلی ایمپئراتورلوغونون بو تورپاقلاردان چکیلمه‌یه باشلادیغی زامان باش وئرن اهالی حرکتلری اونلارا تأثیر ائتمیش و ۱۷۷۰-جی ایلدن اعتباراً بئسسارابیایا کؤچ ائتمه‌یه باشلامیشلار. بو کؤچ دالغاسی ۱۸۱۱-جی ایله قدر فاصیله‌لرله داوام ائتدی.
قاقاوزلارین بیر توپلولوق اولاراق مؤوجودلوغو ۱۱.جی عصره تصادوف ائتسه ده، ۱۸.جی عصرین بیرینجی یاریسینا قدر قاقاوز آدینا هئچ بیر تاریخی و ادبی قایناقلاردا راست گلینمیر. قاقاوز آدی ایلک دفعه ۱۸۱۷-جی ایلده ایندیکی مولداوی و اوکراین‌ین بعضی حیصّه‌لرینین داخیل اولدوغو، تاریخده عوثمانلی حاکیمیتی آلتیندا اولان، لاکین ۱۸۱۲-جی ایل بوخارئست آنلاشماسی ایله روسیه ایمپئریاسینین ترکیبینه داخیل اولان بئسسارابیا بؤلگه‌سینده آپاریلان نفوس ساییمیندا سندلرینده قید ائدیلمیشدیر.
قاقاوز خالقی یقین کی، آدینی سلجوق سولطانی ایکینجی کئیکاووس‌ون آدیندان گؤتورموشدور. ایکینجی کئیکاووس ۱۳-جو عصرین اورتالاریندا بیزانس ایمپئراتورو میخائیل پالئولوقوس‌ون خواهیشی ایله سلاویانلارین بیزانسا باسقینلارینی دایاندیرماق اوچون آنادولودان بالکانلارا بیر نئچه مین نفرلیک قوشون گؤندردی. کئیکاووس‌ون گؤندردیگی بو سلجوقلارین سلاویان موحیطینده دینلرینی دَییشه‌رک خریستیانلاشدیقلاری و کئیکاووس آدینین زامانلا قاقاوز شکلینی آلدیقلاری دوشونولور.
بو گون قاقاوز تورکلری اساساً مولداوی‌نین قاقاوز موختار ویلایتینده یاشاییرلار. بو بؤلگه‌دن باشقا اوکراین‌ین گونئی-باتیسیندا، بولقاریستاندا، دوبروجادا و قافقازدا قاقاوز توپلولوقلاری یاشاییر. قاقاوز موختار ویلایتی ۲۰ آقوست ۱۹۹۰-جی ایلده یارادیلیب و مولداوی‌نین گونئیینده یئرلشیر. بو موختار ویلایت ۱۹۹۴-جو ایلده مولداوی حؤکومتی طرفیندن تانینیب و همین تاریخده باغلانان موقاویله ایله موختار ستاتوس آلیب. باشکندی کومرات شهریدیر. قاقاوزلار خریستیان تورکلردیر و عومومی اهالیسی ۵۰۰ مین جیواریندادیر.
