قاقاووزیا باشقانی گوتسول، پوتین ایله گؤروشدو
"اونا، یوردداشلیق دوروشو و اولوسال چیخارلارا صداقتیمیزدن اؤترو بیزدن اینتیقام آلان مولدووا رهبرلیگینین یاسادیشی گیریشیملریندن دانیشدیم"
روسیا فدراسیونو دؤولت باشقانی ولادیمیر پوتین، مولدووانین اؤزارک بؤلگه‌سی قاقاووزیانین باشقانی یئوگئنیا گوتسول ایله گؤروشدو.
گوتسول، تلگرام کانالیندا گؤروشمه‌نی دگرلندیردی: "ولادیمیر پوتین ایله قاقاووزیانین مرکزده یئر آلدیغی قاریشیق بؤلگه‌سل و ژئوپولیتیک پروبلئملری گؤروشدوک. اونا، یوردداشلیق دوروشو و اولوسال چیخارلارا صداقتیمیزدن اؤترو بیزدن اینتیقام آلان مولدووا رهبرلیگینین یاسادیشی گیریشیملریندن دانیشدیم".
داها سونرا کرملین مطبوعات دفتری ده گؤروشمی ایله باغلی آچیقلاما یاییملادی. آچیقلامایا گؤره گوتسول، پوتینه مولدووا مرکزی رهبرلیگینین قاقاووزیانین صلاحیتلرینی الیندن آلدیغینی، بؤلگه بودجه‌سینی قیسیدلادیغینی، وطنداشلارین حاقلارینی تاپدالادیغینی و اؤلکه‌نی استقرارسیزلیغا سۆرودوگونو ایضاح ائتدی.
قاقاووزیا باشقانی، پوتینین اؤزلرینه دستک سؤزو وئردیگینی سؤیله‌دی.
مولدووا فوریه آیینین سونوندا، آیریلیقچی بؤلگه‌سی ترانس‌دینیسترین میللت وکیللری کنگره‌سینده ولادیمیر پوتینه دستک چاغریسی ائدیلدیکدن سونرا دقتلری اوزرینه چکدی. بو چاغریدان بیر نئچه گون سونرا قاقاووزیا باشقانی یئوگئنیا گوتسول، موسکوانا سفر ائتدی.
قاقاووزیا، اهالیسی تۆرک و مولدووایا باغلی بیر اؤزارک بؤلگه‌دیر. ۱۹۹۰.جی ایلده بؤلگه موستقیللیگینی اعلان ائتدی اما ۱۹۹۴ده مولدووایلا آنلاشما ایمضالایاراق یئنیدن دؤولتین سرحدلری ایچینه داخیل اولدو.
آنلاشما، مولدووانین باشقا اؤلکه‌لرله بیرلشمه‌سی حالیندا قاقاووزیانین آیریلماسی احتیمالینی محفوظ توتور. بورادا باشقا اؤلکه‌لردن نظرده توتولان، آنلاشمادا آدی اولماسا دا رومانیدیر.
