تورک دؤولتلری تشکیلاتی ذیروه‌سی آستانادا داوام ائدیر
قورولوشونون ۱۴.جو ایلینی قوتلایان تشکیلات، بو دفعه "تورک چاغی" قونوسو ایله توپلانیر
تورک دؤولتلری تشکیلاتی ۱۰.جو دؤولت باشقانلاری ذیروه‌سی، قازاقیستانین باشکندی آستانادا بو گون تشکیل ائدیلیر.
قورولوشونون ۱۴.جو ایلینی قوتلایان تشکیلات، بو دفعه "تورک دؤورو" قونوسو ایله توپلانیر.
اورتاق تاریخی و مد‌نی دگرلره صاحب تورک دؤولتلرینین بیر آرایا گله‌رک اولوشدوردوغو (تورک دؤولتلری تشکیلاتی)، تورک دونیاسینی قایناشدیرماغی آماجلارکن، عضو اؤلکه‌لرله اقتصاد‌دان سیاسته، مدنیتدن توریزمه، تحصیلدن ایدمانا قدر مختلیف ساحه‌لرده امکداشلیق شرایطی یارادماغا دایر فعالیتلر ایجرا ائدیر.
قازاقیستانین باشکندی آستانادا ۱۰.جو دفعه بیر آرایا گلن تورک دؤولتلری تشکیلاتی ذیروه‌سینده تورکیه‌نی جمهورباشقانی رجب طیب اردوغان تمثیل ائدیر.
ذیروه‌نین آنا قونوسو "تورک چاغی" اولاراق تعیین اولوندو. ذیروه ایله، تشکیلاتین سیخ گوند‌مینین دارتیشیلاجاغی، لیدئرلرین بیر سیلسیله اؤنملی مؤوضوعدا قرارلار آلاجاغی، اقتصاد، تیجارت، نقلیات و گؤمروک ساحه‌لرینده‌کی تورک دؤولتلری تشکیلاتی پروژه‌لرینه باغلی مختلیف آنلاشمالاری و رسمی سندلری قرارا باغلایاجاقلاری اوست سویه بیر پلتفورم اولوشدورولماسی هدفله‌نیر.
تشکیلاتین دؤنم باشقانلیغینین اؤزبکیستاندان قازاقیستانا گئچه‌جیی ذیروه پروگرامینین قاپانیشیندا دؤولت باشقانلاری، بیر سیرا قرارلا بیرلیکده آستانا سندینی و آستانا ذیروه بیلدیریسینی ایمضالایاجاق.
۳ اکتبر ۲۰۰۹دا آذربایجان، قازاقیستان، قیرقیزیستان و تورکیه طرفیندن ایمضالانان ناخچیوان آنلاشماسییلا قورولان تورک دؤولتلری تشکیلاتی، ۱۴ ایلده تخمیناً ۵ میلیون مربع کیلومتر تورپاغا صاحب عضو اؤلکه‌لری ایله تورک دونیاسینین ژئوپولیتیک مؤقعیتینی گوجله‌ندیره‌ن اولوسلارآراسی بیر تشکیلات حالینا گلدی.
۱۲ نوامبر ۲۰۲۱ده ایستانبولدا تشکیل ائدیله‌ن ۸.جی لیدئرلر ذیروه‌سینده تورک شوراسی اولان آدی، "تورک دؤولتلری تشکیلاتی" اولاراق دییشدیریلدی. ۲۰۱۹داکی باکی ذیروه‌سینده ایسه اؤزبکیستانین دا قاتیلماسییلا عضو ساییسی ۵ه چیخان تورک دؤولتلری تشکیلاتینا تورکمنیستان، ماجاریستان و قوزئی قیبریس تورک جمهوریتی "گؤزلمچی" اولاراق قاتیلیر.
مرکزی ایستانبولدا اولان تورک دؤولتلری تشکیلاتی، بیرلشمیش میللتلر باشدا اولماق اوزره آوروپا گوونلیک و امکداشلیق تشکیلاتی، ایسلام امکداشلیق تشکیلاتی و دونیا گؤمروک تشکیلاتی کیمی چوخ ساییدا اولوسلارآراسی تشکیلاتلا دا اورتاقلیق ائدیر.
ان سون تورکیه‌ده ۶ فوریه‌ده یاشانان زلز‌له‌لر سونراسی ۱۶ مارسدا آنکارادا تشکیل ائدیله‌ن تورک دؤولتلری تشکیلاتی فؤوق‌العاده ذیروه‌سینده بیر آرایا گلن لیدئرلر، یاخین و صمیمی شکیلده تورکیه‌نین یانیندا یئر آلدیقلارینی گوجلو شکیلده حس ائتدیردی.
سؤزو گئدن ذیروه سونراسیندا ایمضالانان آنکارا بیلدیریسینده، "فاجعه یؤنه‌تیمی" قونوسو، تورک دؤولتلری تشکیلاتیین یئنی امکداشلیق ساحه‌لریندن بیری اولاراق تعیین اولوندو.
