لاوروو: آذربایجان-ارمنیستان آراسینداکی ایختیلاف بؤیوک اؤلچوده حل ائدیلدی
روسیا خاریجی ایشلر باخانی لاوروو، ایرانین باشکندی تهراندا "گونئی قافقازدا قالیجی باریش و ثابیتلیگین تاسیسینه دایر بؤلگه‌سل امکداشلیق پلتفورمو" ییغینجاغیندان سونرا ژورنالیستلره آچیقلامالار وئردی
روسیا خاریجی ایشلر باخانی سرگئی لاوروو، آذربایجان ایله ارمنیستان آراسینداکی ایختیلافین بؤیوک اؤلچوده حل ائدیلدیگینی سؤیله‌دی.
لاوروو، ایرانین باشکندی تهراندا ۳+۳ فورمتینده‌کی "گونئی قافقازدا قالیجی باریش و ثابیتلیگین تاسیسینه دایر بؤلگه‌سل امکداشلیق پلتفورمو" ییغینجاغیندان سونرا ژورنالیستلره آچیقلامالار وئردی.
هم باکی هم ایروانین قاراباغین آذربایجانا عاید اولدوغو قونوسوندا همفیکیر اولدوغونو دیله گتیره‌ن لاوروو، "حل ائدیلمه‌میش اصل پروبلئم ده بو ایدی. ایختیلاف بؤیوک اؤلچوده حل ائدیلدی" ایفاده‌لرینی ایشلتدی.
لاوروو، گئرییه، بیر باریش آنلاشماسی حاضرلانماسی، سرحدلرین چکیلمه‌سی و هئچ بیر مانع اولمادان نقلیات باغلانتیلارینین تامین ائدیلمه‌سی باشدا اولماق اوزره ایلیشکیلری تامامیله نورماللاشدیرماغا دایر فعلی آددیملارین قالدیغینی وورغولادی.
بروکسل و واشینگتونون ارمنیستان ایله آذربایجان آراسینداکی سرحدین چکیلمه‌سی سوره‌جینه نفوذ ائتمه‌یه چالیشدیغینی ایفاده ائد‌ن لاوروو، ارمنیلرین ده آذربایجانلیلارین دا فایدالی سایاجاغی هئچ بیر گؤروشمه‌یه قارشی اولمادیقلارینی سؤیله‌دی.
لاوروو، آذربایجان و ارمنیستانین، سرحدلری تعیین ائتمک اوچون روس طرفینین مصلحتچی اولاراق قاتیلاجاغی بیر کمیسیون قوردوغونو دا خاطیرلاتدی.
