آذربایجان: ارمنیستانا باغلی یاسادیشی رژیم یوللارین آچیلماسینی انگلله‌ییر
"اولوسلارآراسی اورتاقلاریمیزی، بو ییخیجی سیاسته سون وئریلمه‌سی اوچون ارمنیستان و اونون قوردوغو یاسادیشی رژیم اوزرینده‌کی باسقیلارینی ایکی قاتینا چیخارماغا چاغیریریق"
آذربایجان جمهورباشقانی موشاویری حیکمت حاجییئو، قاراباغ‌داکی ارمنیستانا باغلی یاسادیشی رژیمین آغدام-خانکندی و لاچین-خانکندی یوللارینین عینی زاماندا آچیلماسینه مانع تؤرتدیگینی ایفاده ائتدی.
حاجییئو، ایکس سوسیال مئدیا حسابیندان یاییملادیغی آچیقلامادا، آذربایجان جمهورباشقانی ایلهام علییئو ایله آمریکا بیرلشمیش دؤولتلری خاریجی ایشلر باخانی آنتونی بلینکنین ۱ سپتامبردا ائتدیگی تلفن دانیشماسیندا، آغدام-خانکندی و لاچین-خانکندی یوللارینین اولوسلارآراسی قیزیل خاچ کومیته‌سینین ائشلیک ائدجگی کامیونلار اوچون ان قیسا مدتده و ائش زامانلی اولاراق آچیلماسی قونوسوندا آنلاشمایا واریلدیغینی، بو قونودا اولوسلارآراسی قیزیل خاچ کومیته‌سی ایله گؤروشمه‌لرینی داوام ائتدیردیکلرینی بیلدیردی.
او تاریخدن بو یانا ۱۲ گون گئچدیگینی خاطیرلادان حاجییئو،
"آنجاق ارمنیستانا باغلی یاسادیشی رژیم بو گئچیشی و یوللارین آچیلماسینی انگلله‌ییر. اولوسلارآراسی اورتاقلاریمیزی، بو ییخیجی سیاسته سون وئریلمه‌سی اوچون ارمنیستان و اونون قوردوغو یاسادیشی رژیم اوزرینده‌کی باسقیلارینی ایکی قاتینا چیخارماغا چاغیریریق. 'بوز آلان' استاتوکوسونو داوام ائتدیرمک و اینسانی پروبلئملری قصدلی اولاراق میلیتاریزه ائتمک اونلارین بوش ایستراتژیسیدیر" ایفاده‌لرینی ایشلتدی.
آذربایجان، قاراباغ‌دا یاشایان ارمنیلرین ارمنیستانا گئدیش گلیشلرده ایستیفاده ائتدیکلری لاچین-خانکندی یولونا، سرحد گؤزتچیلرینه ارمنیستان‌دان آتیش ائدیلمه‌سی و اولوسلارآراسی قیزیل خاچ کومیته‌سینین آراجلاری ایله قاچاق اشیا داشینماسینی سبب گؤستره‌رک بیر مدتدیر قیسیدلاما تطبیق ائدیر.
وطنداشلار اوچون آچیق اولان یولدا آغیر آراجلارین گئچیشینه ایجازه وئریلمیر.
یولون باغلی اولماسینی سبب گؤستره‌رک قاراباغ‌داکی ارمنی اهالینین "اینسانی بحرانلا اوز اوزه قالدیغینی" ادعا ائد‌ن ارمنیستانین گؤندردیگی تریلیلر، تخمیناً بیر آیدیر سرحدده گؤزله‌دیلیر.
اگمن اولدوغو تورپاقلارا اؤزویله داها اؤنجه‌دن دانیشیلمایان گؤندریلره ایجازه وئرمه‌یه‌جگینی ایفاده ائد‌ن باکی یؤنه‌تیمی، قاراباغ‌داکی ارمنی اهالییه گؤندریملر اوچون آغدام-خانکندی یولونو تکلیف ائدیر.
آذربایجان قیزیل آیینین قاراباغ‌دا یاشایان ارمنیلر اوچون گؤندردیگی ۴۰ تون اون یوکلو ۲ کؤمک تریلیسی ده روس گوجلرینین آغدام-خانکندی یولونداکی کنترل نقطه‌سینده تخمیناً ۲ هفته‌دیر گؤزله‌دیلیر. تیریلیلرین گئچیشی، قاراباغ‌داکی ارمنیلرین سؤزده یؤنه‌تیمی طرفیندن انگلله‌نیر.
