آذربایجانین ارمنیلره گؤندردیگی یاردیملار کنترل نقطه‌سینده گؤزله‌ییر
"دونن ده بعضی ارمنی یانلیسی، فسادا بولاشمیش آوروپالی سیاستچیلر آذربایجان سرحدینه گله‌رک تاتر نوماییشی ائتدی. بو کیمی آددیملارین هئچ بیر معناسی یوخدور"
آذربایجان قیزیل آیینین قاراباغ‌دا یاشایان ارمنیلر اوچون گؤندردیگی ۴۰ تون اون یوکلو ایکی کؤمک تریلیسی، روس گوجلرینین آغدام-خانکندی یولون‌داکی کنترل نقطه‌سینده‌کی گؤزله‌مه‌یه داوام ائدیر.
خانکندی و اطراف بؤلگه‌لرده یاشایان ارمنیلره چاتدیریلماسی اوچون ۴۰ تون اون یوکلنه‌ن و باکی‌دان حرکت ائد‌ن ایکی تریلینین، ۲۸ آگوست‌دا چاتدیغی روس گوجلرینین کنترل نقطه‌سیندن گئچیشینه هله ایجازه وئریلمه‌دی.
آذربایجان جمهورباشقانی موشاویری حیکمت حاجییئو ایله دیپلوماتیک میسیون نماینده‌لری، تریلیلرین گؤزلدیگی ساحه‌یه گئدرک اینجه‌له‌مه‌لر آپاردی.
حاجییئو، مطبوعات منسوبلارینا وئردیگی آچیقلامادا، ارمنیستان و بو اؤلکه‌نین آذربایجانین قاراباغ بؤلگه‌سینده اولوشدوردوغو و دستکلدیگی سؤزده رژیمین آغدام-خانکندی یولونون آچیلماسینا مانع تؤرتدیگینی بیلدیردی.
آغدام-خانکندی یولون‌دان امتیناع ائدیلمه‌سینی "عیرقچیلیق" اولاراق دگرلندیردیکلرینی ایفاده ائد‌ن حاجییئو،
"آذربایجان، بوتون یوللاری آچاراق یئنی‌دن قایناشما سوره‌جینه باشلاماق نیتینده‌دیر. آذربایجان، قاراباغ‌داکی ارمنیلرین حاق و گوونلیکلرینی تامین ائتمه‌یه حاضردیر. آنجاق اونلارین یول قونوسونو سیاسی تحریک و دئدی قودو واسطه‌سینه چئویردیگینی گؤروروک" دئدی.
ارمنیستانین آذربایجانلا اؤنجه‌دن دانیشمادان گؤسترمه‌لیک و پوپولیزم مقصدیله لاچین‌داکی سرحد کنترل نقطه‌سینه بعضی واسطه‌لر گتیردیگینی خاطیرلادان حاجییئو،
"دونن ده بعضی ارمنی یانلیسی، فسادا بولاشمیش آوروپالی سیاستچیلر آذربایجان سرحدینه گله‌رک تاتر نوماییشی ائتدی. بو کیمی آددیملارین هئچ بیر معناسی یوخدور" دئیه دانیشدی.
حاجییئو،
"آذربایجان هئچ بیر زامان اؤز اراضیسین‌ده بوز بؤلگه‌نین اولماسینا ایجازه وئرمه‌یه‌جک. آذربایجان، هئچ بیر وضعیت‌ده بؤلوجو رژیمه تحمل ائتمه‌یه‌جک" ایفاده‌لرینی ایشلتدی.
آذربایجان قیزیل آیینین بؤلگه‌ده‌کی ارمنیلره اون گتیردیگینی خاطیرلادان حاجییئو،
"یئنه ده عیرقچی سیاستینین گؤستریجی‌سی اولاراق بونو قبول ائتمیرلر. بو وضعیت یئنی‌دن قایناشمایا 'یوخ' دئمه‌لری معناسینی وئریر. یوک‌دن ایمتینا ائدیلمه‌سین‌ده مسئولیت تام اولاراق سؤزده رژیم‌ده و ارمنیستان رهبرلیگینده‌دیر" شکلینده دانیشدی.
حاجییئو، بعضی باتی مطبوعاتیندا وضعیتین تحریف ائدیله‌رک عکس ائتدیریلدیگینی سؤیله‌یه‌رک،
"آذربایجان اراضیسین‌ده هر هانسی بیر یاسادیشی بؤلگه‌نین، مرکزی حکومتینین کنترلو دیشیندا‌کی هر هانسی بیر اراضینین وارلیغی قبول ائدیله‌بیلمز" دئدی.
بؤلگه‌یه گئدن تورکیه‌نین باکی ائلچیسی جاهید باغچی، آذربایجان تورپاقلارین‌دا یاشانان حادثه‌لرین آذربایجانین تورپاق بوتونلوگو و اگمنلیک حاقلاری چرچیوه‌سینده اله آلینماسی لازیم اولدوغونو، تورکیه‌نین یاناشیمینین دا بو ایستیقامتده اولدوغونو ایضاح ائتدی.
آذربایجان، قاراباغ‌دا یاشایان ارمنیلرین ارمنیستانا گئدیش گلیشلرده ایستیفاده ائتدیکلری لاچین-خانکندی یولونا، سرحد گؤزتچیلرینه ارمنیستان‌دان آتیش ائدیلمه‌سی و اولوسلارآراسی قیزیل خاچ تشکیلاتی آراجلاری ایله قاچاق اشیا داشینماسینی سبب گؤستره‌رک بیر مدتدیر قیسیدلاما تطبیق ائدیر.
وطنداشلار اوچون آچیق اولان یول‌دا آغیر واسطه‌لرین گئچیشینه ایجازه وئریلمیر.
یولون باغلی اولماسینی سبب گؤستره‌رک قاراباغ‌داکی ارمنی اهالینین "اینسانی بحرانلا اوز اوزه قالدیغینی" ادعا ائد‌ن ارمنیستانین گؤندردیگی تریلیلر، تخمیناً بیر آیدیر سرحدده گؤزله‌دیلیر.
اگمن اولدوغو تورپاقلارا اؤزویله داها اؤنجه‌دن دانیشیلمایان گؤندریمه ایجازه وئرمه‌یه‌جگینی ایفاده ائد‌ن باکی رهبرلیگی، قاراباغ‌داکی ارمنی اهالییه گؤندریملر اوچون آغدام-خانکندی یولونو تکلیف ائدیر.
ایلگیلی‌لی خبرلر
تورکیه-آذربایجان ایکیلی مانورو تاماملاندی
میللی مدافعه ناظیرلیگی، "تورکیه-آذربایجان ایکیلی سات مانورو-۲۰۲۴"ون موفقیتله تاماملاندیغینی بیلدیردی
