بایراموو، لاوروولا گؤروشدو

روسیا خاریجی ایشلر باخانی سرگئی لاوروو، آوروپا بیرلیگینین ارمنیستان-آذربایجان سرحدینین ارمنیستان طرفینده یئرلشن نماینده‌لیگینین حکومت باخیمیندان جدی شوبهه‌لر اویاندیردیغینی سؤیله‌دی.

لاوروو، رسمی گؤروشمه‌لر اوچون گئتدیگی آذربایجان‌دا، خاریجی ایشلر باخانی جئیحون بایراموولا گؤروشدو.

باش باشا و هیئتلر آراسی گؤروشمه گئرچکلشدیرن لاوروو و بایراموو، اورتاق مطبوعات توپلانتیسیندا دانیشدی.

آذربایجان ایله ارمنیستان آراسین‌دا سرحدلرین تعیین اولونماسی و باریش آنلاشماسینین حاضرلانماسینا کؤمک ائتمه‌گه حاضر اولدوقلارینی وورغولایان لاوروو، تورکیه، ایران و گورجوستانین دا قاتیلاجاغی ۳+۳ فورمتینین بؤلگه‌نین گله‌جگی اوچون اؤنملی اولاجاغینی قید ائتدی.

آوروپا بیرلیگینین ارمنیستان-آذربایجان سرحدینین ارمنیستان طرفینده یئرلشن نماینده‌لیگینه باغلی لاوروو،

"بیز، آوروپا بیرلیگینین ارمنیستان و آذربایجان ایله ایلیشکیلریندن نئجه سوءایستیفاده ائتدیگینی گؤروروک. ارمنیستان‌دا اولان آوروپا بیرلیگینین نماینده‌لیگی حکومت باخیمیندان جدی شوبهه‌لر اویاندیریر" دئدی.

لاوروو، بیر ژورنالیستین ارمنیستان باشباخانی نیکول پاشینیانین "روسیانین ارمنیستان‌داکی عسگری وارلیغی گوونلیگیمیزی ضمانت ائتمیر، تام ترسی تهدید ائدیر" شکلینده‌کی آچیقلاماسینی خاطیرلاتماسی اوزرینه، "پاشینیانین آچیقلاماسینی اونون ویجدانینا بوراخیرام" آچیقلاماسینی وئردی.

آذربایجان خاریجی ایشلر باخانی بایراموو دا،

"ارمنیستان باریش اوچون آنلاشماز توتوم سرگیله‌ییر. بیز گئرچک نتیجه‌لره متمرکز اولموش دورومداییق. آنجاق ایندی سانکی آنلاین دیپلوماسی یئریدیریک. تکلیفلرینی آنلاین اولاراق گؤندریرلر. بو یاناشما نتیجه مرکزلی دئییل. ارمنیستان بیر آن اول بوندان واز گئچمه‌لی و موذاکیره ماساسینا قاییتما‌لیدیر" دئیه دانیشدی.