بایراموو و لاوروو لاچین دالانینداکی دورومو دانیشدی
آذربایجانلی چئورهچی مدنی قورولوش عضولری ایله آکتیویستلر، آذربایجاندا معدنلرین یاسادیشی ایشلهدیلمهسینین اؤنلنمهسی طلبی ایله ۱۲ دسامبردا لاچین دالانیندا اعتراض باشلادمیشدی
روسیانین خاریجی ایشلر باخانی سرگئی لاوروو و آذربایجان جمهوریتی خاریجی ایشلر باخانی جیحون بایراموو لاچین دهلیزیندهکی وضعیتی موذاکیره ائتدی.
آذربایجان جمهوریتی خاریجی ایشلر باخانلیغیندان وئریلهن معلوماتا گؤره، لاوروو و بایراموو آراسیندا تلفن دانیشیغی اولدو.
بایراموو تلفن دانیشماسیندا، گئچیجی اولاراق روسیا گۆجلرینین یئرلشدیریلدیگی آذربایجان تورپاقلارینداکی معدنلرین قانونسوز ایشلهدیلمهسی و لاچین یولوندان سوءایستیفاده ائدیلمهسینین دوردورولماسی ایله باغلی ائدیلن اعتراضلاردا سسلندیریلن طلبلرین هله ده یئرینه یئتیریلمهدیگینی، قوشاتما و اینسانی وضعیتله باغلی ادعالارین هئچ بیر دایاناغی اولمادیغینی بیلدیردی.
ارمنیستانین آذربایجان جمهوریتی تورپاقلارینی ۳۰ ایل بویو ایشغال آلتیندا ساخلاماسینا باخمایاراق، ۲-جی قاراباغ ساواشیندان آز مدت سونرا آذربایجانین ارمنیستانلا ایلیشکیلرین قورولماسی و نورماللاشماسی اوچون تکلیفلر وئردیگینی و باریشین تامین اولونماسی اوچون چابا گؤستردیگینه ایشاره ائدن بایراموو، ارمنیستانین تخریباتلارینین پروسهیه انگل اولدوغونو بیلدیردی.
آذربایجان جمهوریتی، ارمنی اهالینین یاشادیغی و گئچیجی اولاراق روس گۆجلرینین یئرلشدیریلدیگی آذربایجان تورپاقلاریندا معدنلرین قانونسوز شکیلده ایشلهدیلمهسی و بونون نتیجهسینده چئورهیه وئریلن ضررین آراشدیریلماسی و کنترل ائدیلمهسی آماجی ایله ۱۰ دسامبردا بؤلگهیه اوزمان اکیپلر گؤندریلمیش، بو اکیپلرین بؤلگهیه گیریشی ارمنیلر طرفیندن انگللنمیشدی.
بو وضعیت اۆزرینه آذربایجانلی چئورهچی مدنی قورولوش عضولری ایله آکتیویستلر، آذربایجاندا معدنلرین یاسادیشی ایشلهدیلمهسینین اؤنلنمهسی طلبی ایله ۱۲ دسامبردا لاچین دالانیندا اعتراض باشلادمیشدی.
اعتراضچیلار، آذربایجان جمهوریتی تورپاقلارینداکی ارمنی اهالینین ارمنیستانا گئدیش گلیشده ایستیفاده ائتدیگی تک یول اولان و لاچین دهلیزی اولاراق تانینان یولدا "ائکولوژیک ترورا سون قویولماسی" شعارلاری و پلاکاردلارییلا طلبلرینی دیله گتیریر.