آذربایجان: ایرانا اومودوموز و اعتمادیمیز یوخ
"دیپلوماتیک ایلیشکیلر حاقیندا وین سؤزلشمه‌سینه گؤره هر دؤولت اؤلکه‌ده‌کی ائلچیلیکلرین گۆونلیگیندن سوروملودور. دوغال اولاراق باش وئره‌ن ترور سالدیریسیندا ایران مسئولیت داشیییر"
آذربایجان جمهوریتی، تهران ائلچیلیگینین فعالیتینی دوردوردو، ائلچیلیک امکداشلاری آذربایجان جمهوریتینه قاییتدی.
اوچاقلا باشکند باکییا قاییدان تهران ائلچیلیگینین امکداشلاری و اونلارین عائله عضولرینی آذربایجان خاریجی ایشلر باخانی یاردیمچیسی خلف خلفوو و باخانلیقدان مسئوللار قارشیلایدیلار.
ائلچیلیک بیناسینا جمعه گۆنو تشکیل ائدیلن سالدیری سیراسیندا شهید اولان گۆونلیک باشقانی اورخان عسگرووون جنازه‌سی ده عینی اوچاقلا باکییا آپاریلدی.
خاریجی ایشلر باخانی یاردیمچیسی خلفوو، تهران ائلچیلیگینه سالدیرینین ترور ائیلمی اولدوغونو سؤیله‌دی. خلفوو،
"بو (سالدیری) قبول ائدیلمز بیر عملدیر. دیپلوماتیک ایلیشکیلر حاقیندا وین سؤزلشمه‌سینه گؤره هر دؤولت اؤلکه‌ده‌کی ائلچیلیکلرین گۆونلیگیندن سوروملودور. دوغال اولاراق باش وئره‌ن ترور سالدیریسیندا ایران مسئولیت داشیییر.
ایران، تعهدلارینا اویغون اولاراق، ترور سالدیریسینی جامع شکیلده، هر یؤنو ایله و شفاف اولاراق آراشدیرمالی، سوچلولاری و اونلارین آرخاسیندا دوران گۆجلری معین ائتمه‌لی و جزالاندیرمالیدیر. بو، بیزیم ایراندان آچیق طلبیمیزدیر" دئدی.
خلفوو، حادثه‌یه آیدینلیغا قووشدورولماسی اوچون مرتبط اولوسلارآراسی مکانیزملردن ده ایستیفاده ائتمه‌یی پلانلادیقلارینی بیلدیردی.
"جمهوباشقانیمیز، چتین بیر قرار اولسا دا تهران ائلچیلیگینین بوشالدیلماسی قرارینی آلدی. هر هانسی بیر اؤلکه‌ده، ائلچیلیگین فعالیتینی، دیپلوماتیک فعالیتی داوردورماق مسئولیت طلب ائد‌ن بیر قراردیر آنجاق ائلچیلیک امکداشلارینین گۆونلیگینین تاعمین ائدیلمه‌سی باخیمیندان ایرانا اومودوموز و اعتمادیمیز یوخ" ایفاده‌لرینی ایشلتدی.
قونشو اؤلکه‌ده شهید وئردیکلری اوچون چوخ کدرلندیکلرینی وورغولایان خلفوو:
"تهران ائلچیلیگینین دیپلوماتیک فعالیتی تامامیله دوردورولدو. اوردا بینانی قوروماق اوچون ۵ نفر اولاجاق آنجاق بو شخصلر دیپلوماتیک فعالیت گؤسترمه‌یه‌جکلر. تبریز باش کونسوللوغوموز ایسه فعالیتینی داوام ائتدیره‌جک" بیلیگیسینی پایلاشدی.
آذربایجانین تهران ائلچیلیگینه ۲۷ ژانویه‌ده سحر ساعاتلاریندا تشکیل ائدیلن سلاحلی سالدیری نتیجه‌سینده ائلچیلیگین محافظ تیمی رئیسینین یاشامینی ایتیردیگی و ایکی محافظین یارالاندیغی بیلدیریلمیشدی.
ایرانلی مسئوللار، سالدیرقانین حادثه‌دن سونرا یاخالاندیغینی آچیقلامیشدی.
آذربایجان خاریجی ایشلر باخانلیغی دا سالدیرینی قینامیش و تهران ائلچیلیگینین بوشالدیلاجاغینی بیلدیرمیشدی.
آذربایجان جمهوریتی جمهورباشقانی ایلهام علییئو ده آچیقلاماسیندا، سالدیرینی ترور ائیلمی اولاراق تانیملامیشدی.
