تۆرک دؤولتلری تشکیلاتی آغ‌ساققاللار شوراسی توپلانتیسی باشلادی
"دونیانین و بؤلگه‌میزین قارشی قارشییا قالدیغی تهدید و سینامالار قارداش تۆرک دؤولتلرینین بیر بیری ایله امکداشلیغینی داها ایرلییه داشیمالاری گئرچگینی اورتایا قویماقدادیر"
قیرقیزیستانین باشکندی بیشکئک‌ده بو ایل ۱۳.جوسو گئچیریله‌ن تۆرک دؤولتلری تشکیلاتی آغ‌ساققاللار شوراسی توپلانتیسی باشلادی.
عدالت و قالخینما پارتیسی باشقان یاردیمچیسی بینعلی ییلدیریمین باشقانلیغی ایله گئچیریله‌ن توپلانتییا، تۆرک دؤولتلری تشکیلاتی باش کاتیبی باغدات آمره‌یئو، شورانین قیرقیزیستان نماینده‌سی مددکان شریم‌قولوو، آذربایجان نماینده‌سی حسن حسنوو، قازاقیستان تمثیلچیسی ایکرام آدیربک، اؤزبکیستان تمثیلچیسی بختیار سیف‌الله‌یئو ده قاتیلیر. تۆرکمنیستانی ایسه رجب بازاروو تمثیل ائدیر.
توپلانتیداکی دانیشماسیندا، ۱۱ نوامبردا اؤزبکیستان‌دا گئچیریله‌جک اولان تۆرک دؤولتلری تشکیلاتی ذیروه‌سینه توخونان بینعلی ییلدیریم:
"بوندان اؤنجه ۲۹ سپتامبر – ۲ اکتبر آراسیندا تۆرکییه‌ده بورسایا باغلی ایزنیک شهرینده دونیا کؤچری اویونلارینی گئچیره‌جییک. آماجیمیز بو اویونلاری بوتون دونیا اؤلکه‌لرینه یایماق و بئله‌جه مدنی-تاریخی بیرلیکده‌لیگیمیزی داها دا ساغلاملاشدیرماقدیر" دئدی.
ییلدیریم بو اویونلارین گله‌جک‌ده تۆرک دؤولتلری و تۆرک دونیاسی اوچون بیر المپیک اؤزللیگینه ده قوووشابیله‌جگینی سؤیله‌دی.
تۆرکمنیستانین گئچمیش جمهورباشقانی قوربان‌قولو بردی‌محمدووون آغ‌ساققاللار شوراسینا داخیل ائدیلدیگینی بیلدیره‌ن ییلدیریم:
"بو، آغ‌ساققاللار شوراسینی گوجله‌ندیره‌ن چوخ اؤنملی بیر آددیمدیر. هیئتیمیز ایچینده یئر آلماسی بیزه گوج وئره‌جک" دئیه دانیشدی.
تۆرک دؤولتلری تشکیلاتی باش یازمانی آمره‌یئو ده آورآسیا جغرافیاسینین سینامالارلا قارشی قارشییا اولدوغونا دقت چکرک،
"دونیانین و بؤلگه‌میزین قارشی قارشییا قالدیغی تهدید و سینامالار قارداش تۆرک دؤولتلرینین بیر بیری ایله امکداشلیغینی داها ایرلییه داشیمالاری گئرچگینی اورتایا قویماقدادیر" شکلینده دانیشدی.
