داشکند-ده اولوسلار آراسی نقلیات دهلیزلری‌نین اینکیشافی ایمکان‌لاری موذاکیره ائدیلیب
اؤزبکیستان-ین پایتاختی داشکند-ده تورکیه-اؤزبکیستان-آذربایجان خاریجی ایشلر، تیجارت و نقلیات ناظیرلرینین اوچ طرف‌لی گؤروشو اولوب.
اؤزبکیستان-ین پایتاختی داشکند-ده تورکیه-اؤزبکیستان-آذربایجان خاریجی ایشلر، تیجارت و نقلیات ناظیرلرینین اوچ طرف‌لی گؤروشو اولوب.
تورکیه-دن خاریجی ایشلر ناظیری مولود چاووش اوغلو، تیجارت ناظیری محمت موش، نقلیات و آلت یاپی ناظیری عادیل کاراایسماعیل اوغلو، آذربایجان‌دان خاریجی ایشلر ناظیری جیهون بایراموو، دیجیتال اینکیشاف و نقلیات ناظیری رشاد نبی یئو، اقتصادیات ناظیری میکائیل جباروو، اؤزبکیستان‌دان خاریجی ایشلر ناظیری ولادیمیر ناروو، نقلیات ناظیری ایلهام محکاموو، خاریجی تیجارت و یاتیریم ناظیرینین معاوینی لازیز کودرتوو ایشتیراک ائدیب‌لر.
اوچ طرف‌لی توپلانتی‌نین آچیلیشیندا چیخیش ائدن ولادیمیر ناروو بیلدیریب: "گؤروشوموز آذربایجان طرفی‌نین تکلیفی و تورکیه-نین دستکی ایله حیاتا کئچیریلیب.
اولوسلار آراسی علاقه‌لر و قلوبال اقتصادیاتدا باش وئرن سرعت‌لی پروسه لر اصلینده تورکیه-اؤزبکیستان-آذربایجان دیالوق فورماتی‌نین اینکیشافینی ضروری ائتدی و بو، ان قیسا زاماندا ایجرا اولونمالییدی.
دؤولت باشچی‌لاری‌نین سیاسی ایراده‌سی و سون ایللر چکدیک‌لری یول‌لار سایه‌سینده اؤزبکیستانین آذربایجان و تورکیه ایله موناسیبت‌لری یئنی دؤوره قدم قویوب و ایستراتژی اهمیت قازانیب.
اؤلکه‌لریمیز بیر چوخ اولوسلار آراسی مسئله‌ده اورتاق موضع توتوب و عینی مقصد اوچون سعی گؤستریب. بو، باریشچیل، دایمی و دینامیک تورک دونیاسی‌نین بیر آرایا گلمه‌سی دئمک‌دیر.
تورکیه، اؤزبکیستان و آذربایجانین بولگه لر آراسی امکداش‌لیقدا مهم رول اویناییر.
تورک خالق‌لاری‌نین یاشادیغی بو بؤلگه‌لر مین ایللردیر دوغو ایله باتی، قوزیی ایله گونئی آراسیندا کؤرپودور. دؤولت‌لریمیزین ایراده‌سی چوخ اؤنم‌لی‌دیر.
اؤزبکیستان باکی-تفلیس-قارص دمیر یولونون ترانزیت پتانسیلیندن فعال ایستیفاده‌یه بؤیوک اهمیت وئریر.
چین-قیرغیزیستان-اؤزبکیستان دمیر یولو لاییحه‌سی‌نین تیکینتی‌سی اوزره تکنیکی-اقتصادی اساسلاندیرما‌لار بو گون ده داوام ائدیر. بو دمیر یولونو ترانس- قافقاز دهلیزینه بیرلش‌دیرمکله چین-دن آوروپایا قدر اوزانان جوغرافیادا شبکه یاراتماق فیکریندییک. بو باخیمدان اؤزبکیستان زنگزور دهلیزی‌نین یئنی‌دن آکتیولشمه‌سینی دستکلییر. آسیا و آوروپا آراسیندا بو مسیر ان قیسا یول اولا‌جاق".
توپلانتیدا تورکیه، اؤزبکیستان و آذربایجانین خاریجی ایشلر، تیجارت و نقلیات ناظیرلری اورتاق مسئله‌لر، خصوصیله اوچ طرف‌لی مکانیزمه اساساً خزر کئچیدلی دوغو – باتی اورتا کوریدورونون یارادیلماسیندا کووردیناسیون و امکداشلیغین آرتیریلماسی ایله باغلی موذاکیره‌لر آپاریرلار.
ناظیرلر توپلانتی‌دان سونرا داشکند بیاننامه‌سینی ایمضالایا‌جاق‌لار.
