علییئو: بیرلشمیش میللتلرده اصلاحات آپاریلماسینی دستکلهییریک
"بعضی دوروملاردا قطعنامهلر قیسا مدتده ایجرا اولوندوغو حالدا، ایش آذربایجانا گلنده بو قرارلار کاغیذ اوزرینده قالدی"
آذربایجان جمهورباشقانی ایلهام علییئو، بیرلشمیش میللتلر تشکیلاتی گۆونلیک شوراسیندا اصلاحات ائدیلمهسینی دستکلدیکلرینی سؤیلهدی.
ایلهام علییئو، باشکند باکیدا گئچیریلهن باغلانتیسیزلار حرکتی پارلمان شبکهسی کنفرانسینین آچیلیشیندا، بیرلشمیش میللتلر گۆونلیک شوراسینین قطعنامهلرینین بعضی دوروملاردا قیسا مدتده ایجرا اولوندوغونو، بعضی حاللاردا ایسه ایللرجه کاغیذ اوزرینده قالدیغینی بیلدیررک،
"بیز اصلاحاتلاری دستکلهییریک. بیرلشمیش میللتلر گۆونلیک شوراسی قطعنامهلرینین سیاسی اوستونلوک تملینده ایجراسی دوردورولمالیدیر" دئدی.
دانیشماسیندا، آذربایجان تورپاقلارینین بیر زامانلار ارمنیستان طرفیندن ایشغال آلتیندا توتولماسیندان، بؤلگهده باش وئرهن ییخیملاردان دانیشان علییئو، آذربایجانین اؤز تورپاقلارینی قورتاراراق عدالتی و اولوسلارآراسی حقوقو برپا ائتدیگینی بیلدیردی.
علییئو، مسئلهنین حلی اوچون قورولان آوروپا گۆونلیک و امکداشلیق تشکیلاتی مینسک قروپونون هئچ بیر حل یولو تاپابیلمهدیگینی خاطیرلاداراق،
"مینسک قروپو پروبلئمین ابدی قالماسینی ایستهیهنلرین آلتی اولدو. بو گون آذربایجان اؤزو تورپاق بوتؤولوگونو اؤزو تامین ائتدیگی اوچون آرتیق مینسک قروپونا احتیاج قالمادی" دئدی.
ارمنیستانلا آذربایجان آراسینداکی چاتیشمانین تکجه بؤلگهسل دئییل، کۆرهسل بیر پروبلئم اولدوغونو وورغولایان ایلهام علییئو بئله داوام ائتدی:
"چونکو بو، تکجه اولوسلارآراسی حقوقون اساس پرنسیپلرینین تامامیله پوزولماسی دئییل، هم ده بیرلشمیش میللتلر گۆونلیک شوراسی قطعنامهلرینین کوبود شکیلده پوزولماسی و نظره آلنماماسی ایدی. ۱۹۹۳ده بیرلشمیش میللتلر گۆونلیک شوراسی طرفیندن ۴ قطعنامه قبول ائدیلدی. بو قطعنامهلرده ارمنیستاندان قید شرطسیز ایشغال ائتدیگی تورپاقلاردان چیخماسی طلب اولونوردو. آنجاق بو قطعنامهلر اویقولانمادی. بعضی دوروملاردا قطعنامهلر قیسا مدتده ایجرا اولوندوغو حالدا، ایش آذربایجانا گلنده بو قرارلار کاغیذ اوزرینده قالدی.بو وضعیت، بیرلشمیش میللتلر گۆونلیک شوراسیندا اصلاحاتلارین آپاریلماسی مسئلهسینی گوندمه گتیریر.اگر بیرلشمیش میللتلر گۆونلیک شوراسینین قطعنامهلری حیاتا گئچیریلمیرسه، اوندا بونلاری قبول ائتمهنین نه معناسی وار؟ بیز اصلاحاتلاری دستکلهییریک. بیرلشمیش میللتلر گۆونلیک شوراسی قرارلارینین سیاسی اوستونلوک اساسیندا ایجراسی دوردورولمالیدیر".
ایلگیلیلی خبرلر
قیرقیزیستاندا مافیا ماللاری ساتیشا چیخاریلدی
ساتیلان املاک، متشکیل سوچلار و فسادلا موباریزه چرچیوهسینده دؤولتین مولکیتینه گئچمیشدی