قازاخیستان-دا خوجا‌لی فاجعه‌سی‌نین قوربان‌لاری آنیلیب

قازاخیستانین پایتاختی نور سلطاندا خوجا‌لی سویقیریمی‌نین 30-جو ایلدؤنومو ایله باغلی آنیم مراسیمی کئچیریلیب.

آذربایجانین نور سلطان سفیرلیگی و اولوسلار آراسی تورک آکادئمیاسی ایله بیرگه کئچیریلن مراسیمده سفیرلر، اولوسلار آراسی تشکیلات‌لارین نوماینده‌لری، دیپلومات‌لار، ژورنالیست‌لر و وطنداش‌لار ایشتیراک ائدیب‌لر.

آذربایجانین نور سلطان‌داکی سفیری آغا‌لار آتاموغلانوو آنیم مراسیمینده‌کی چیخیشیندا آذربایجان تاریخی‌نین ان دهشت‌لی صحیفه‌سی کیمی خاراکتریزه ائتدیگی خوجا‌لی قتل عامیندان 30 ایل کئچدیگینی بیلدیریب.

“1992-جی ایل فوریه‌نین 25-دن 26-نا کئچن گئجه باش وئرنلری کئچن بو قدر مدت‌دن سونرا دانیشماق هله ده آغری‌لی‌دیر” دئییب.

همین گئجه 63-و اوشاق اولماقلا 613 آذربایجان وطنداشی‌نین قتله یئتیریلدیگینی خاطیرلا‌دان آتاموغلانوو دئییب:

“بو ایل بیز خوجا‌لی فاجعه‌سی قوربان‌لاری‌نین خاطره‌سینی فرق‌لی بیر حیس ایله آنیریق. ارمنیستانین تخریبات‌لارینا و حربی تجاووزونه قارشی باشلایان وطن محاربه‌سی (27 سپتامبر 2020-جی ایل – 10 نوامبر 2020-جی ایل، ایکینجی قاراباغ محاربه‌سی) نتیجه‌سینده بیرلشمیش میللت‌لر تشکیلاتی‌نین تهلوکه‌سیزلیک شوراسی‌نین قطعنامه لری یئرینه یئتیریلیب، تاریخی عدالت برپا اولونوب”.

مراسیم خوجا‌لی فاجعه‌سینه عایید فوتوشکیل‌لردن عبارت سرگی ایله باشا چاتیب.