توکایئو: اولایلار، اجتماعی عدالتسیزلیکدن قایناقلاندی
"وارسیل ایله یوخسول آراسین‌داکی اوچوروم قبول ائدیله‌بیلمز سویه‌یه چاتدی"
قازاقیستان جمهورباشقانی قاسم جومرت توکایئو، اؤلکه‌ده یاشانان سون حادثه‌لرین وارلی ایله یوخسول آراسین‌داکی اوچورومون قبول ائدیله‌بیلمز بیر سویه‌یه چاتماسیندان قایناقلاندیغینی سؤیله‌دی.
توکایئو، ایش دونیاسی نماینده‌لریله ائتدیگی ییغینجاق‌دا، آی باشین‌دا اؤلکه‌ده یاشانان عصیانلارین، ایللردیر ییغیلان پروبلئملری اورتایا چیخاردیغینی ایفاده ائتدی.
حاضیردا دؤولتین اجتماعی نظامی تملیندن دؤنوشدورمک کیمی استراتژیک بیر وظیفه ایله قارشی قارشییا اولدوغونو ایفاده ائدن توکایئو،
"وارسیل ایله یوخسول آراسین‌داکی اوچوروم قبول ائدیله‌بیلمز سویه‌یه چاتدی" دئدی.
توکایئو، اؤلکه‌ده‌کی عصیانلارین اجتماعی ائشیدسیزلیک‌دن قایناقلاندیغینا ایشاره ائد‌رک،
"تروریست میلیتانلار ایله اونلارین آرخاسین‌داکی توطئه‌چیلر بو وضعیتدن سوءایستیفاده ائتدی" دئیه دانیشدی.
قازاقیستان‌داکی ثروتین یاریسینین یالنیز ۱۶۲ نفرین الین‌ده اولدوغونا باغلی اولوسلارآراسی آراشدیرما شیرکتلرینین ادعالارینی دوغرولایان توکایئو، اؤلکه‌ده قابیلیت‌لی گیریشیمچیلرین ایمکانلارینی محدودلاشدیران و بیر چوخ سرمایه‌نین تک الده اولدوغو مؤوجود اولیگوپول سیستمین عاجل دییشدیریلمه‌سی لازیم اولدوغونا دقت چکدی.
توکایئو، اؤلکه‌ده سیاسی دؤنوشوم سیاستینی داوام ائتدیرجگینی ایفاده ائد‌رک،
"توپلومون مدرنلشمه‌سی و سیاسی دؤنوشوم سیاستینی داوام ائتدیره‌جه‌یه‌م. اصلاحاتلارین ایستیقامتی بللیدیر. بو، سربست بازارا، سوسیال مرکزلی چئشیدلندیریلمیش اقتصادا گئچیش" ایفاده‌لرینی ایشلتدی.
