"ارمنیستان‌دان یاخشی نیت گؤرسه‌ک باریش آنلاشماسی اوزرینده چالیشابیلریک"

علییئو، بؤلگه‌نین باریشی و ثابیتلیگینه خیدمت مقصدیله ناتو عضوو تورکیه ایله یالنیز بو ایل ۷ اورتاق عسگری مانور ائتدیکلرینی سؤیله‌دی

1747563
"ارمنیستان‌دان یاخشی نیت گؤرسه‌ک باریش آنلاشماسی اوزرینده چالیشابیلریک"

آذربایجان جمهوریتی جمهورباشقانی ایلهام علییئو، ارمنیستان‌دان یاخشی نیت گؤرمه‌لری حالین‌دا بو اؤلکه ایله باریش آنلاشماسی اوزرین‌ده چالیشمایا باشلایابیله‌جکلرینی سؤیله‌دی.

علییئو، بلژیکین باشکندی بروکسل‌ده‌کی ناتو قرارگاهین‌دا ناتو باش کاتیبی ینس استولتنبرگ ایله اورتاق مطبوعات کنفرانسیندا دانیشدی.
علییئو، استولتنبرگ ایله گله‌جک‌ده‌کی امکداش‌لیق پلانلارینی دانیشدیقلارینی، آذربایجانین ناتونون عسگری تعلیملرینه قاتیلدیغینی، بؤلگه‌نین باریشی و ثابیتلیگینه خیدمت مقصدیله ناتو عضوو تورکیه ایله یالنیز بو ایل ۷ اورتاق عسگری مانور ائتدیکلرینی سؤیله‌دی.

آذربایجانین بؤلگه‌ده باریش، ثابت‌لیک و اؤن‌گؤروله‌بیلیرلیک ایسته‌دیگینی وورغولایان علییئو،:

"چابالاریمیز بؤلگه‌ده یئنی بیر ساواش ریسکینی مینیموما ائندیرمه مقصدینی داشیماق‌دادیر. بو مقصدله ان یاخشی یول ارتباط کاناللارینی آچیق ساخلاماق، آکتیو دیالوگ قورماق و یئنی‌دن قونشو اولماغی اؤیره‌نمک‌دیر. سیاستیمیز چوخ آچیقدیر. ارمنیستان طرفین‌دن یاخشی نیت گؤرسه‌ک تکلیف ائتدیگیمیز کیمی ایکی اؤلکه آراسین‌دا باریش آنلاشماسی اوچون ایشه باشلایابیلریک"دئدی. 
علییئو بئله داوام ائتدی:
"بیز آذربایجان‌دان ارمنیستان واسطه‌سیله ناخچیوانا گئدن دمیر یولو خطینین تیکیلمه‌سی ایله باغلی آنلاشدیق. آیریجا، اتومبیل یولونون اینشاسی ایله باغلی دا آنلاشما الده ائتمیشیک. آنجاق اتومبیل یولونون ایستیقامتی هله دقیقلشمه‌دی. بو، گله‌جک مذاکیره‌لرین قونوسودور. بیز بو آخشام اوچلو گؤروشمه‌ده موطلق بو مسئله‌نی مذاکیره ائده‌جییک. زنگه‌زور دهلیزین‌دن ایستیفاده قایدالارینا گلینجه، بو، لاچین دهلیزین‌ده‌کی کیمی اولمالیدیر. چونکو اوچلوبیلدیریده آچیق شکیل‌ده گؤستریلدی کی، لاچین دهلیزی واسطه‌سیله آذربایجان ارمنیستان و قاراباغ آراسین‌دا ارتباط اوچون تهلوکه‌سیز و مانعسیز گیریش تامین ائدیر. ارمنیستان دا آذربایجان و ناخچیوان آراسین‌دا مانعسیز گیریشی و تهلوکه‌سیزلیگی تامین ائتمه‌لیدیر. بو گون لاچین دهلیزین‌ده گؤمروک پستو یوخدور. زنگه‌زور دهلیزین‌ده ده گؤمروک پستو اولمامالی‌دیر. اگر ارمنیستان یوکلری و اینسانلاری یوخلاماق اوچون گؤمروک پستونون قورولماسین‌دا اصرار ائدرسه، بیز ده لاچین دهلیزین‌ده عینی اصراری ائده‌جییک. بو منطق‌لیدیر. بو مسئله‌ده قرار ارمنیستانین اوزرینه دوشور. بیز ایکی سئچه‌نه‌گه ده حاضیریق. یا هر ایکی طرف‌ده گؤمروک پستو اولمور، یا دا هر ایکی طرف‌ده گؤمروک پستو قورولور".



ایلگیلی‌لی خبرلر