آذربایجان، ایرانین ادعالارینی یالانلادی

"تأسف کی، بو ایللر عرضین‌ده دوست ایران دؤولتیندن، سرحدیمیزین بیر قیسمینین ایشغال آلتیندا توتولماسینا دایر ایندیکی کیمی سرت تپکی ائشیتمه‌دیک"

1714332
آذربایجان، ایرانین ادعالارینی یالانلادی

آذربایجان جمهوریتی، ایرانین آذربایجان-ایران سرحدی یاخینلیغین‌دا اوچونجو اؤلکه گوجلرینین اولدوغو ادعالارینی رد ائتدی.

آذربایجان خاریجی ایشلر باخانلیغی سؤزچوسو لیلا عبدالله‌یئوا ایرانین خاریجی ایشلر باخانی حسین امیر عبداللهیانین اؤلکه‌سین‌ده‌کی بیر تلویزیون کانالینا وئردیگی مصاحبه‌ده آذربایجانلا باغلی ایر‌لی سوردویو بعضی ادعالاری دگرلندیردی.

عبداللهیانین آذربایجان-ایران سرحدی یاخینلیغین‌دا اوچونجو اؤلکه‌لره عاید گوجلرین اولدوغو ادعالاری ایله باغلی یازی‌لی آچیقلاما وئرن عبدالله‌یئوا،

"هئچ بیر اساسی اولمایان بو ادعالاری قبول ائتمیریک. آذربایجان تورپاقلاریندا دؤولتیمیزه و یا قونشو اؤلکه‌لریمیز اوچون تهلوکه یارادابیله‌جک هر هانسی بیر گوجون، او جمله‌دن تروریست عنصورلارین وارلیغی دارتیشیلماز بئله" دئیه بیلدیردی.

عبدالله‌یئوا،

"تأسف کی، (ارمنیستانلا) ۴۴ گونلوک ساواشدا بعضیلری بو جور اساسسیز ادعالار ایر‌لی سوردو. او زامان بو ادعالارین اساسسیز اولدوغونو بیلدیردیک و ایندی ده تکرار ائدیریک و بو واختا قدر بو قونودا آذربایجانا هئچ بیر دلیل سونولمامیشدیر " ایفاده‌سینی قوللاندی.

عبدالله‌یئوا، اولوسلارآراسی سویه‌ده تانینمیش سرحدلرین توخونولمازلیغینین آذربایجان اوچون هر زامان اساس پرنسیپلردن بیری اولدوغونو قید ائدرک،

"آذربایجان ایللرجه ایشغال‌دان و اولوسلارآراسی سرحدلرینین پوزولماسین‌دان اذیت چکدی. اؤزللیکله ایرانلا سرحدیمیزین ۱۳۰ کیلومتردن چوخ قیسمی اوزون ایللر ارمنیستانین ایشغالی آلتیندا قالدی. تأسف کی، بو ایللر عرضین‌ده دوست ایران دؤولتیندن، سرحدیمیزین بیر قیسمینین ایشغال آلتیندا توتولماسینا دایر ایندیکی کیمی سرت تپکی ائشیتمه‌دیک" ایفاده‌لرینه یئر وئردی.

ایران خاریجی ایشلر باخانی عبداللهیانین "خاریجی گوجلرین آذربایجانا مداخیله‌سی" ادعاسینا عبدالله‌یئوا،

"آذربایجان هر زامان اولوسال چیخارلارینا دایالی باغیمسیز خاریجی سیاست یئریدیر و بونو سون ۳۰ ایلده آتدیغی ملموس آددیملارلا دفعه‌لرله اثبات ائتمیشدیر. قونشو اؤلکه‌لرله دوستانه و یاخشی قونشولوق ایلیشکیلرینین گلیشدیریلمه‌سی دیش سیاستیمیزین تنل اؤنجه‌لیکلریندن بیردیر و بو ایستیقامت‌ده داوام‌لی آددیملار آتیریق" شکلینده جاواب وئردی.



ایلگیلی‌لی خبرلر