چاووش‌اوغلو: قیریمین یاسادیشی ایشغالینی تانیمادیق و تانیمایاجاغیق

خاریجی ایشلر باخانی مؤولود چاووش‌اوغلو، تورکیه‌نین اوکراینانین سرحد بوتؤولویونو دستکله‌دیگینی ایفاده ائد‌رک، "قیریمین یاسادیشی ایشغالینی هئچ تانیمادیق و تانیمایاجاغیمیزی دا دایما وورغولاییریق" دئدی.

چاووش‌اوغلو اوکراینادا قیریم پلتفورمونون قورولوش ذیروه‌سی اؤنجه‌سی بیر آچیقلاما وئردی.

تورکیه‌نین اوکراینانین تورپاق بوتؤولویونه اولان دستگینی و قیریم تاتارلارینین حاقلارینا وئردیگی اؤنمی گؤسترمک اوچون ذیروه‌یه قاتیلدیغینی بیلدیرن چاووش‌اوغلو،

"قیریمین یاسادیشی الحاقینی هئچ تانیمادیق و تانیمایاجاغیمیزی دا دایما وورغولاییریق. یالنیز بونو دئمک کیفایت دئییل. قیریم و اوکراینانین تورپاق و سرحد بوتؤولویونو اوکراینایا دستک وئره‌ن دیگر دوست و متفیق اؤلکه‌لرله ایفاده ائدیریک، دستگیمیزی وورغولاییریق" ایفاده‌سینی ایشلتدی. چاووش‌اوغلو، پلتفورمون قیریم و قیریم تاتارلارینین حاقلارینین ساوونماسین‌دا و اوکراینانین سرحد بوتؤولویونون قورونماسین‌دا اؤنملی رول اوینایاجاغینا ایناندیغینی وورغولادی.

تورکیه ایله اوکراینا آراسین‌دا چوخ یاخشی ایکیلی ایلیشکیلرین اولدوغونو ایفاده ائد‌ن چاووش‌اوغلو،

"مختلیف ساحه‌لرده ایلیشکیلریمیزی داها دا گلیشدیرمک اوچون چوخ چالیشیریق. سئوگیلی دوستوم دیمیتری کولبا (اوکراینانین خاریجی ایشلر باخانی) ایله اورتاق استراتژیک پلانلاما توپلانتی‌سینی گئچیرمک اوچون اکتبر آیین‌دا یئنی‌دن اوکراینایا گله‌جه‌یه‌م" دئدی.